ՀՀ նախագահական ընտրություններին հետևող ԵԱՀԿ/ԺՄԻԳ դիտորդական առաքելությունն օրերս հրապարակեց հետընտրական միջանկյալ զեկույցը, որտեղ արձանագրված էր, որ հեռարձակող որոշ լրատվամիջոցներ ընտրովի վերաբերմունք են ցուցաբերել:
Զեկույցում մասնավորապես նշված էր. «ԵԱՀԿ/ԺՄԻԳ դիտորդական առաքելության կողմից ուսումնասիրված բոլոր լրատվամիջոցները կանոնավոր կերպով լուսաբանում էին Րաֆֆի Հովհաննիսյանի կազմակերպած հավաքները, սակայն «Հ1»-ը, «Շանթ»-ը և «Արմենիա» հեռուստաընկերությունները հաճախ ներկայացնում էին ընդհանուր և երբեմն մակերեսային լուսաբանում` շարունակ կրկնելով, որ հավաքները լիազորված չեն և հաղորդելով ոստիկանության հայտարարությունները»:
Aravot.am-ը Հանրային հեռուստաընկերության լրատվական և վերլուծական հաղորդումների տնօրեն Գևորգ Ալթունյանից հետաքրքրվեց` ԵԱՀԿ գնահատականը հիմնավոր համարո՞ւմ են: Նա այսպես արձագանքեց. «Այդ գնահատականը հիմնավոր չեմ համարում: Օրինակ` ընտրարշավի ընթացքում եղավ դեպք, երբ նրանք ինձ մեղադրեցին, թե իմ հեղինակային հաղորդման ընթացքում կողմնակալություն եմ դրսևորում ԲՀԿ, ՀԱԿ, ՀՅԴ կուսակցությունների և որոշ թեկնածուների նկատմամբ: Նախ նայեցի իմ բոլոր տեքստերը, տեսա, որ այդպիսի վերաբերմունք այնտեղ չկա, հետո պաշտոնական նամակ գրեցի նրանց ու բացատրություն խնդրեցի այն մասին, թե ինչ ձևակերպումների մասին է խոսքը: Բայց այդպես էլ պատասխան չստացա: Սա առաջին դեպքը չէ, և ցավոք այդպիսի գնահատականների արտահայտումը պարբերական բնույթ է կրում: Մենք մեր աշխատանքն ենք անում, թե ինչպես կգնահատեն եվրոպացի դիտորդները, դա մեզ հետաքրքրում է միայն նրանով, որ մեր աշխատանքի գնահատականներից մեկն է»:
«Շանթ» հեռուստաընկերությունից ևս մեզ հայտնեցին, որ համամիտ չեն ԵԱՀԿ գնահատականներին և շեշտեցին. «Առաջին անգամ չէ, որ այդ կարգի կազմակերպություններից նման գնահատական ենք ստանում: Նրանք չգիտեն` ինչն են ինչին գումարել, որ ստացել են այդպիսի վերջնական պատկեր»:
Կարդացեք նաև
Տաթև ՀԱՐՈՒԹՅՈՒՆՅԱՆ
