Հսկա խաչը տեսանելի է ադրբեջանական դիրքերից
2012թ. սեպտեմբերի 23-ին կայացած համայնքի ղեկավարի ընտրությունների արդյունքում Տավուշի մարզի սահմանամերձ Բաղանիս գյուղում 3 թեկնածուներից հաղթեց ամենաերիտասարդը՝ 1986թ. ծնված Նարեկ Սահակյանը: Նա մասնագիտությամբ պատմաբան է, ՀՅԴ անդամ: Գյուղապետ Նարեկ Սահակյանը անցած կես տարում բավական աշխատանքներ է կատարել սահմանամերձ գյուղում հայրենասիրական ոգին վառ պահելու համար: Նրա նախաձեռնությամբ փետրվարի 13-ին Բաղանիսում կանգնեցվել է Հայաստանի անկախության համար նահատակվածների հիշատակի խաչքար: Գյուղապետարանի առաջ կանգնեցվել է 13,5 մ բարձրությամբ դրոշակաձող, որի վրա ծածանվում է հայոց եռագույն դրոշը: Գյուղի բարձունքին, ադրբեջանական դիրքերին դեմ-հանդիման, հնադարյան սրբատեղի Հարսնաքարում կանգնեցվել է մեծ խաչ, որը գիշերները լուսավորվում է: Այն մշտապես տեսանելի է Փայտասարի լանջերին տեղակայված ադրբեջանական դիրքերից: Հարսնաքարը հին սրբավայր է, չափերով ոչ մեծ խաչը այստեղ հառնում էր նաեւ խորհրդային տարիներին: 1990թ. օգոստոսին սրբավայրը ռմբակոծվել է խորհրդային ռազմական ուղղաթիռների կողմից: Հավելենք, որ 832 բնակիչ ունեցող Բաղանիսը հայ-ադրբեջանական զինված հակամարտության տարիներին ուժեղ հրետակոծվել եւ գնդակոծվել է, ունեցել 8 զոհ:
Կարդացեք նաև
Ոսկան ՍԱՐԳՍՅԱՆ
