Սերժ Սարգսյանի այցը համընկնում է նոր գրքի լույսընծայման հետ
Նոյեմբերյանի սոցիալական ծառայության պետ,Հայաստանի գրողների միության անդամ Սամվել Բեգլարյանը հունվարի 29-ին Նոյեմբերյանի ավագ դպրոցում Սերժ Սարգսյանի հետ հանդիպման ժամանակ իր ելույթում դրվատեց նախագահի քաղաքականությունը, նրա նախընտրական «Դեպի ապահով Հայաստան» կարգախոսը, նաեւ ասաց, որ Նոյեմբերյան Սերժ Սարգսյանի ամեն այցը զուգադիպում է իր հերթական գրքի լույսընծայման հետ:
Նոյեմբերյան քաղաքում լուրեր են տարածվել, թե Սերժ Սարգսյանը Սամվել Բեգլարյանի խնդրանքով վերջինիս հերթական գրքի տպագրության համար 3 հազար դոլար է նվիրաբերել: Սամվել Բեգլարյանը երդվեց, որ հանրապետության նախագահի հետ նման խոսակցություն չի եղել, մեզ հայտնելով. «Երբ իմ ելույթից հետո ես մոտեցա իրեն (Սերժ Սարգսյանին), ասաց՝ շնորհակալություն ինձ ճիշտ ընկալելու համար: Ես իմ գիրքն էի նվիրում իրեն, թիկնապահն ասաց, նախագահին ուզո՞ւմ եք գիրք տալ, պետք է մեզ հանձնեք, հանձնեցի: Ոսկեպարում նոր տարուն նախագահի հետ պարել եմ, նոր չեմ ճանաչում հանրապետության նախագահին: Ասաց (Նոյեմբերյանի հանդիպման ժամանակ-Ո. Ս.) ի՞նչ խնդիրներ ունեք, ասացի պարոն նախագահ, ես նմա՞ն եմ այն մարդուն, որ խնդիրներ ունի, ես խնդիրներ լուծող եմ, ծիծաղեց, մեջքիս էլ խփեց: Պարզապես շփոթում են: Երբ Նոյեմբերյանի քաղաքապետի՝ պ-ն Ամիրաղյանի 50-ամյակը նշում էինք (2012թ. մայիսի 23-ին- Ո.Ս.), ես բանաստեղծություն կարդացի Վանուշ Ամիրաղյանին նվիրված՝ աքրոստիկոս, հավանեց (մարզպետը- Ո.Ս.), ես աքրոստիկոսներ ունեմ նաեւ պ-ն Ղուլարյանին նվիրված, հավանեց, ասաց՝ շատ լավ բանաստեղծություն է, դրսում էինք արդեն: Ասացի՝ պարոն Ղուլարյան, դուք ընդամենը հավանում եք իմ բանաստեղծությունները, բայց տպելու համար ինչու չեք… Պարզ էլ ասացի՝ շատ ուրախ եմ, որ իմ գրչեղբայր Լյուբիկին ( մարզպետի օգնական, իջեւանցի բանաստեղծ Լյուբիկ Չիբուխչյանին -Ո.Ս.) օգնում եք, ինչու՞ չեք ինձ էլ օգնում, ասաց `օգնեմ, Սամվել ջան: Տնավարի, դե գիտեք, մենք նույն կուսակցության մեջ ենք, իր աշխատողն եմ: Ասաց, օգնեմ Սամվել ջան, ինչքա՞ն է պետք, ասել եմ՝ ես հո Լյուբիկի նման մեծ տիրաժներ չեմ ուզում: Հաշվի բան է, ասաց՝ մի 1 միլիոն դրամը կբավարարի՞, ասացի՝ կբավարարի: Դե լավ, բարով- խերով ընտրություններ- բան կավարտվեն, կգանք-կվերջացնենք, ասաց՝այս տարի հնարավոր չէ, ես ի վիճակի չեմ իմ տարեվերջում ծախսերը… Մարդն իր անձնականից պիտի տա, հո մարզպետարանը փող չունի, ասաց՝ եկող տարի այդ հարցերը … Բայց երջանիկ կլինեմ , եթե այդ հարցը լուծի: Բայց, եթե նույնիսկ պ-ն Ղուլարյանը տա, դա նախագահ Սարգսյանի հետ, իմ ելույթի հետ ոչ մի կապ չունի»:
Ս. Բեգլարյանին հարցրինք՝ մարզպետը ե՞րբ կտա գրքի տպագրման փողը: Գրողն ասաց. «Դե ընտրությունները բարով- խերով անենք, ինչպես գիտեք` Նոյեմբերյանում բացասական ենք գնացել (Րաֆֆի Հովհաննիսյանը Սերժ Սարգսյանից ավելի շատ ձայն է ստացել-Ո.Ս.), մարզպետի տրամադրությունը մի քիչ բարձրանա, գնամ ասեմ՝ իմ յուղն ու բրինձը…»:
Կարդացեք նաև
Ոսկան ՍԱՐԳՍՅԱՆ
Մարդու մարմնի ճարպը բավարար է 7 կտոր օճառ պատրաստելու համար, հետաքրքիր է,ինչքան օճառ պետք կլինի…
Նողկալի է…և՝ գրող…
Փառք աստծո, որ Նոյեմբերյանում արժանապատիվ մարդիք ավելի շատ են, քան այս պոետի
նմանները: Հուսադրող է: