Քիչ առաջ Ազատության հրապարակում հրավիրված հանրահավաքում ելույթ ունեցավ «Սարդարապատ» միության անդամ Ժիրայր Սեֆիլյանը: Նա ընդգծեց, որ շատ կարեւոր է, որպեսզի չկրկնվեն նախկին սխալները. «Շատ են խոսում, որ Արցախի խնդիր ունենք եւ այլն եւ այլն: Թող այդ լոլոները իրենց գլխի՛ն կարդան: Մենք այլեւս ժամանակ չունենք: Եթե մենք լսենք այդ գործակալներին, մենք ոչ միայն Արցախն ենք կորցնելու, այլեւ ամբողջ Հայաստանը: Կա տարբերություն նախորդ տարիների հետ կապված: 2008-ին նրանց հաջողվեց սեպ խրել Արցախի բնակչության եւ հայաստանաբնակների միջեւ: Նրանց այս անգամ չի հաջողվելու մեզ կասեցնել, որովհետեւ ամբողջ սփյուռքը, երբ մեզ տեսնում է միասին Րաֆֆի Հովհաննիսյանի հետ, չեմ կասկածում, բոլորը միանալու եւ սատարելու են մեզ՝ հասնելու մեր նպատակին: Ես համոզված եմ եւ հավատում եմ, որ մեր ըմբոստ ժողովրդի այդ շարժման արդյունքում վերածնելու ենք նոր Հայաստան: Այլեւս որեւէ մեկս խաբելու իրավունք չունենք մեր ժողովրդին, ոչ մի կասկածելի գործչի չենք թողնելու, որ բարձրանա այս հարթակին»:
Հռիփսիմե ՋԵԲԵՋՅԱՆ
