Րաֆֆի Հովհաննիսյանը պահանջում է նրանց հրաժարականը:
Քիչ առաջ Ազատության հրապարակում Սերժ Սարգսյանի ինքնաբացարկը պահանջելուց հետո Րաֆֆի Հովհաննիսյանը անդրադարձավ վարչապետին: Նա Տիգրան Սարգսյանին նույնպես հրավիրեց հրապարակ. «Պարո՛ն Սարգսյան, հարգանքով հանդերձ, ոչ հեգնական, եկեք այստեղ եւ պատասխա՛ն տվեք սեփական ժողովրդին: Ասեք, խնդրեմ, աղքատության, անգործության, արտագաղթի, մենաշնորհների, ՓՄՁ-ների խեղման, մեր բնության խեղման, Թեղուտի որոշման. ամո՛թ ձեզ Թեղուտի վերջին որոշման համար: Եկեք հաշվետվություն տվեք հակապետական, հակասահմանադրական պահվածքի համար, հարկային, մաքսային տեռորի համար: Եկեք այստեղ, մինչեւ այստեղ մենք կառուցենք մեր ապագա իշխանությունը: Ունեցեք այդ բարությունը, քրիստոնեությունը գալ եւ հաշվետվություն տալ Հայաստանի հաղթական ժողովրդին»:
Նա պահանջեց նաեւ քաղաքապետ Տարոն Մարգարյանի հրաժարականը եւ նրան նույնպես հրավիրեց Ազատության հրապարակ:
Սերժ Սարգսյան, Տիգրան Սարգսյան, Տարոն Մարգարյան: Թե ամսի քանիսին հրավիրեն Ազատության հրապարակ նրանց՝ Րաֆֆի Հովհաննիսյանը քվեարկության դրեց այդ հարցը. «Ո՞վ է ուզում մարտի 5-ին, թե՞ մարտի 8-ին»: Հավաքվածների մի մասը կոչ էր անում մարտի 8-ին հրավիրել՝ ասելով, որ նրանց կանանց տոնին պետք է հրավիրել: Սակայն ժողովրդի մեծամասնությունը քվեարկեց մարտի 5-ի համար, ուստի որոշվեց մարտի 5-ին՝ երեքշաբթի, սպարապետ Վազգեն Սարգսյանի ծննդյան օրը ժամը 14-ին հավաքվել. «Ով է այդ տղամարդը, այդ պաշտոնյան, որ պատրաստ է ժողովրդի հետ հայացք կիսել, եւ ասել՝ ներողություն, ես ինքնաբացարկ եմ տալու: Եթե որոշենք դիմել ՍԴ, սա համարենք ՍԴ-ի վերջին շանսը: Դեռ որոշված չէ, վաղը մեր իրավաբանների հետ պիտի քննարկենք: Խորհրդարանի խոսնակի եւ ֆրակցիաների մասին այսօր չեմ խոսի, մարտի 5-ին ժամը 5-ին կքննարկենք»:
Կարդացեք նաև
Հռիփսիմե ՋԵԲԵՋՅԱՆ
