«Հայաստանում իրականացվող զբոսավարների միջազգային դասընթացները նպատակ ունեն էլ ավելի զարգացնել տարածաշրջանում զբոսաշրջության կարևորությունը և պատրաստել հմուտ մասնագետներ, ովքեր կհամապատասխանեն միջազգային չափորոշիչներին»,-այսօր այս մասին «Մարիոթ Արմենիա» հյուրանոցում ասաց ՀՀ էկոնոմիկայի նախարության զբոսաշրջության վարչության պետ Մեխակ Ապրեսյանը:
Նա չի հերքում, որ այս ոլորտում խնդիրները շատ են և նրանցից պահանջվում է պատրաստել որակյալ կադրեր, ինչը կնպաստի թե’ տեղական, և թե’ միջազգային շահերին:
Զբոսավարների համաշխարհային ֆեդերացիայի նախագահ Ֆելիսիտաս Վրեսնիգը ճեպազրույցի ընթացքում ասաց, որ դասընթացներն արդեն սկսվել են և այն իրականացվում են համալսարաններում. «Նպատակն է հնարավորինս շատ երիտասարդներ ներգրավել դասընթացներին: Այս դասընթացները հնարավորություն կտան միջմշակութային կապ հաստատելու, ինչպես նաև ունենալու որակյալ մասնագետներ»,-ասաց նա:
Հիշեցնենք, որ «Հայ զբոսավարների գիլդիա» հասարակական կազմակերպությունը, WFTGA-հետ համագործակցությամբ, Հայաստանում կազմակերպել է զբոսավարների միջազգային դասընթացների երկու փուլ և ՀՀ էկոնոմիկայի նախարարության հրավերով ֆեդերացիայի նախագահ Ֆելիսիտաս Վրեսնիգը և փոխնախագահ, կրթական դեպարտամենտի ղեկավար Վիլյա Սիբին 2013 թվականի փետրվարի 27 –ից մարտի 3–ը Հայաստանում են` տեղում հանդիպումներ ունենալու և քննարկելու Հայաստանում զբոսավարների միջազգային կրթական կենտրոն հիմնելու հնարավորությունը:
Կարդացեք նաև
Քրիստինա ՄԻՐԶՈՅԱՆ
