Մարտի 3-ը գրողի համաշխարհային օրն է
«27 տարի է աշխարհը նշում է գրողի մեծարման օրը, այն մասնագիտական տոն է եւ չի մտնում օրացույցի մեջ: Այն տեղեկատվության եւ խոսքի ազատության խթանման համար է: Մենք պետք է գնահատենք, արժեւորենք եւ քարոզենք գրողի ստեղծագործությունները»,-այսօր ժամանակակից հայ գրականության ձեռքբերումների եւ ապագա ծրագրերի մասին լրագրողների հետ հանդիպման ժամանակ նշեց Հայաստանի գրողների միության նախագահ Լեւոն Անանյանը:
Նրա պնդմամբ Գրողների միությունը համախմբում է շուրջ 500 գրողի, որոնց գերակշիռ մասը Հայաստանում է.
«Գրական սերունդը ակտիվ է ներկայանում, պետությունը կարծես թե իր մասնակցությունը ունի: Գիրքը աստիճանաբար դառնում է ապրանք, շեշտը դնելով մանկական գրականության եւ ժամանակակից գրողների վրա: Պահանջարկը կա հատկապես դասական գրականության եւ հեքիաթների»:
Բանախոսի համոզմամբ այսօր գրողը գնահատվում է պետական, ՀՀ նախագահի եւ գրողների միության մրցանակով, այսինքն լիարժեք հնարավորություն կա գնահատելու գրողի ստեղծագործությունը. չնայած, որ մտավորականը ամենախոցելի խումբն է.
«Ընթերցանության ճգնաժամի սառույցը ճաք է տվել, մեր բանակցությունները դեռեւս փակուղի են մտել: Յուրաքանչյուր գրող բերում է աշխարհը ներկայացնելու իր տեսլականը: Մենք ապրիլ ամսին կկազմակերպենք պոեզիայի միջազգային փառատոն, այն մեր երազանքն է եւ կլինի վերջին ակորդը «Երեւանը գրքի համաշխարհային մայրաքաղաք» միջոցառման»:
Անժելա ՇԱՀՈՒՄՅԱՆ
