Լոռու մարզի ջրամատակարարման բնագավառի համար առաջնային հիմնախնդրի` համակարգի մաշվածության լուծման համար տարիներ կպահանջվեն:
«Լոռու մարզի գյուղական բնակավայրերի ջրամատակարարման ու ջրահեռացման ցանցերը խիստ անբարվոք ու մաշված վիճակում են, ինչը լուրջ խնդիր է առաջացնում բնակչության ջրամատակարարման հարցում: Ջրի կորուստները ջրագծերում անցնում են 55 տոկոսը: Գլխամասային կառույցները չունեն սանիտարական պահպանման գոտիներ, բնակչությանը տրվող ջուրը հիմնականում չի վերավարակազերծվում», -այս խնդիրներին օրերս կայացած մարզի խորհրդի այս տարվա առաջին նիստի ժամանակ անդրադարձավ Լոռու մարզպետ Արթուր Նալբանդյանը:
Նա տեղեկացրեց, որ մարզի ջրամատակարարման ու ջրահեռացման խնդիրները միայնակ չեն կարող լուծել:
Կարդացեք նաև
«Լոռու մարզի ջրամատակարարման բնագավառի համար առաջնային հիմնախնդիր է համակարգի մաշվածությունը, որը նախատեսվում է կարգավորել հետագա տարիներին պետբյուջեի եւ ՀՀ-ում իրականացվող համապատասխան ծրագրերի ֆինանսավորմամբ, որովհետեւ մենք շատ լավ գիտակցում ենք, որ համայնքային բյուջեն չունի այդ ֆինանսական հնարավորությունները, որ ինքը իր ուժերով կարողանա լուծել այդ հիմնախնդիրը»,-եզրափակում է Արթուր Նալբանդյանը:
2012 թվականից մարզի տարբեր համայնքների խմելու ջրի մատակարարման բարելավման նպատակով կատարվել է շուրջ 1 միլիարդ 993 միլիոն դրամի համապատասխան աշխատանքներ: 2011 –ին այս թիվը կազմել է 1 միլիարդ 688 միլիոն դրամ:
Անուշ ԲՈՒԼՂԱԴԱՐՅԱՆ
