Եվրասիա միջազգային համալսարանում այսօր տեղի ունեցավ մամլո ասուլիս «Սահմանափակ հնարավորություններով անձանց բարձրագույն մասնագիտական կրթության ապահովում» խորագրով:
ՀՀ-ում 2001թ-ից որոշակի աշխատանքներ են տարվել կրթական ծրագրի շրջանակներում իրականացնելու ներառական կրթություն: Բազմաթիվ դպրոցներ իրականացնում են ներառական կրթություն և հաջողության հասնում: Նախկինում եղած հատուկ դպրոցների զգալի մասը փակվել է սակայն հանրակրթական ծրագրին մինչև այսօր չէր հաջորդում բարձրագույն մասնագիտական ծրագիրը: Այս ծրագիրն էլ նպատակ ունի լրացնելու այդ բացը, այն աշակերտները, ովքեր որ կյուրացնեն հանրակրթական ծրագիրը, աստիճանաբար անցում կկատարեն բարձրագույն մասնագիտական կրթական ծրագիր: Սա մի ծրագիր է, որը իրականացվելու է Եվրամիության ՏԵՄՊՈւՍ ֆինանսական ծրագրի աջակցությամբ:
Ծրագրին մասնակցում են ՀՀ-ից մի շարք հաստատություններ Եվրասիա միջազգային համալսարանը, որ հանդիսանում է հայաստանյան բուհերի և կազմակերպությունների համակարգողը, Հայաստանի պետական մանկավարժական համալսարանը, Հայաստանի կառավարման ակադեմիան, Գորիսի պետական համալսարանը և «Հույսի կամուրջ» հասարակական ընկերությունը:
Եվրասիա միջազգային համալսարանի ռեկտոր Սուրեն Օհանյանն ասում է, որ ծրագիրը ենթադրում է որոշակի յուրահատուկ նորարական մոտեցումներ հատուկ կարիք ունեցող մարդկանց բարձրագույն, մասնագիտական, կրթական գործունեությունը ապահովելու համար: Նախատեսվում է ստեղծել ռեսուրս կենտրոններ. դա կլինի միջբուհական կենտրոն, հեռակա ուսուցման համար անհրաժեշտ բոլոր ռեսուրսները, յուրահատուկ առարկայական ծրագրեր, դասընթացներ, և ամենակարևորը, որ բոլոր պայմանները կստեղծվեն, եւ հավասար իրավունքներ: Այս ծրագիրը ներառում է ինչպես բակալավրի աստիճան, այնպես էլ՝ մագիստրոսական և ասպիրանտուրական աստիճան:
Ֆիոնա Հալլետտոն` Անգլիայի Էդջ Հիլ համալսարանի կրթության ֆակուլտետի դոկտոր պրոֆեսորն էլ ավելացնում է.«Ծրագրի նպատակն է իրականացնել բարեփոխումներ կրթական համակարգում, որպեսզի ինտեգրվեն և հնարավորություն ունենան կրթություն ստանալ այն անձինք, ովքեր ունեն կրթական հատուկ կարիքներ: Ծրագիրը իրականացվում է համատեղ եվրոպական երկրների և նախկին Սովետական միության երկրների հետ միասին: Ծրագրին իրենց մասնակցությունն ունեն նաև Վրաստանը և Հայաստանը»:
ՏԵՄՊՈւՍ ծրագրի համակարգող, Դրեզդենի Տեխնոլոգիական համալսարանի դոկտոր, պրոֆեսոր Գերարդ Քուլենն էլ հավելեց.« Այս պահին ծրագրի նպատակն է ապահովել հասանելիության սահմանափակում ունեցող անձանց դեպի հասարակություն: Ծրագրի շրջանակներում շատ կարևորվում են մարդու իրավունքները, ազատությունը, հասանելիությունը, արժանապատվությունը»:
Ծրագիրն իր մեջ ներառելու է երեք մակարդակի ուսուցում `
Ուսուցում համալսարանական մակարդակով,
Ուսուցում հասարակական կազմակերպությունների մակարդակով,
Ուսուցում կառավարման մարմինների մակարդակով:
Արմինե ՀԱՄԲԱՐՁՈՒՄՅԱՆ
