Ազգագրագետի խոսքով` Փակ շուկայի օրինախախտ սեփականատերը պետք է պատասխանատվության ենթարկվի
«Անկախ Հայաստանում դարերից եկող էթնիկ արժեքները չեն կարողանում ավանդանանալ, եւ մեր քաղաքը դադարում է քաղաք դառնալու պրոցեսով ընթանալ: Այսպես վարվում են գաղութային երկրներում` վերացնելով կարեւոր նշանակության կառույցները»,-այսօր Ճարտարապետների միությունում Փակ շուկայի խնդրով կազմակերպված քննարկման ժամանակ ասաց ազգագրագետ Հրանուշ Խառատյանը: Խոսելով վերջին մեկ տարվա ընթացքում Մշակույթի նախարարության կատարած քայլերից` նա ասաց. «Նախարարությունը խնդրին ոչ համաչափ արձագանք է տվել: Մշակույթի նախարարն ասաց, որ քննարկումներ են տեղի ունենում, բայց քա՞նի կոպեկի արժեք ունեն դրանք: Ի՞նչ եք այդքան ժամանակ քննարկում: Դրա փոխարեն կարելի էր դատի տալ վարչական նորմերը խախտողին»:
Խառատյանի խոսքով. «Պատկան մարմինները հագուրդ են տալիս մի քանի մարդու ցանկություններին»:
Քննարկմանը ներկա ՀՀ մշակույթի փոխնախարար Արեւ Սամուելյանը փաստեց, որ նախարարությունում մի ամբողջ գրապահարան կա` Փակ շուկայի վերաբերյալ դիմումներով եւ պատասխաններով. «Չեմ եկել այստեղ` ինչ-որ բացատրություններ տալու համար: Նախարարը նշել է, որ փետրվարից քննարկման մեջ է նոր նախագիծ, որն այս պահին մասնագիտական քննարկման փուլում է եւ վերջնական եզրակացությունը կտանք առաջիկայում: Նախագծի համաձայն` պետք է ամրակայվեն եւ վերակառուցվեն շուկայի գոյություն ունեցող կամարները»:
Կարդացեք նաև
Նախախորհրդարանի անդամ Տիգրան Խզմալյանն անդրադառնալով մտավորականների` երկրի ղեկավարին կրկին նամակ ուղղելու մտադրությանը, ասաց. «Դա արդեն ծիծաղելի է: Որոշ մարդիկ, որոնց անունները հայտնի են, «բռնաբարել» են մեր խորդրդանիշները: Նրանք պետք է ենթարկվեն պատասխանատվության»:
Լուիզա ՍՈՒՔԻԱՍՅԱՆ
