ԱԺ «Ժառանգություն» խմբակցության նախկին պատգամավոր Լարիսա Ալավերդյանը վրդովվել է «Ազատության հրապարակում» երգիչ, երգահան Ռուբեն Հախվերդյանի երեկվա ելույթից, ըստ որի՝ Արցախը հեռավոր ադրբեջանական գավառ է:
«Երեկ եղել է մի արտահայտություն, որն ինձ շատ նեղացրել է: Ես շատ վրդովված եմ: Ինձ ասել են, որ ինքը իրեն թույլ է տվել արտահայտություն, որն ավելի հարիր է, օրինակ, տնտեսագետին: Ես նրա ջատագովն եմ ու մնալու եմ այդպիսին: Կարծում եմ` դա լեզվի սայթաքում էր, չեմ ուզում մտածել` մտքի սայթաքում է… պետք չէ ամեն մեկս ամեն մի ոլորտի մեջ մտնել»,- Aravot.am-ին ասաց տիկին Ալավերդյանը:
Նա մտավախություն ունի, որ պարոն Հախվերդյանի «լեզվի սայթաքումից» կօգտվեն ոչ թե Ադրբեջանում, այլ Հայաստանի ներսում. «Այլեւս չեմ խոսելու, թե Ադրբեջանում ինչպես է ընկալվում: Ես համարում եմ` Ադրբեջանն իր քաղաքական էլիտայի շնորհիվ իջել է քաղաքակրթական ամենացածր մակարդակի վրա: Մեր խնդիրն է լինելու օգնել ադրբեջանցի ժողովրդին այդ դեգրադացիայից դուրս գալու համար»:
Արփինե ՍԻՄՈՆՅԱՆ
