Այսօր Ազատության հրապարակում բացօթյա ասուլիսում Րաֆֆի Հովհանիսյանը պատասխանելով լրագրողների հարցին՝ անդրադարձավ ՍԴ դիմելու հիմքերին: Նա վստահեցրեց, որ դրանք շատ լուրջ են. «Մենք դիմել ենք նվազագույնը 120 տեղամասի վերաբերյալ: Մերժվել են մեր բոլոր ջանքերը, բացի չորսից, որպեսզի մենք ունենանք վերահաշվարկ եւ խայտառակ ընտրությունների վերանայման հնարավորություն: Քրգործերի համար ուրախ եմ, գտնում եմ, որ հազարավոր ընտրակեղծիքների ապացույցներ եւ փաստեր կան, դրանք ներառում են մարզպետեր, քաղաքապետեր, բխում են ամենատարբեր պաշտոնյաներից: Թող ընտրովի չլինի, սլաքը չուղղվի, բոլորը վերեւից ներքեւ պիտի պատասխան տան: Եթե թոզ փչելու համար է՝ կդատապարտվի»:
Րաֆֆի Հովհաննիսյանի գնահատմամբ՝ «Այս ընտրությունները կեղծված էին եւ դրա ապացույցները կան, թե ինչպես Երեւանում հավաքում էին ուսուցիչներին տնօրենները եւ ուղղորդում: Փաստեր կան, թե ինչպես են բռնություն կիրառելով վստահված անձերի նկատմամբ, պարզապես լցոնեցին: Փաստեր կան, թե ինչպես հազարավոր պետական շենքերի վրա մի թեկնածուի քարոզչապաստառները կային՝ խախտելով հանրության պատկանող սեփականության իրավունքը: Խախտելով իրենց ուխտը՝ ուղղորդեցին մեր հպարտության աղբյուր զինվորներին՝ բաց քվեարկության: Ապացույցները շատ են, համատարած: Որեւէ կասկած չունեմ, որ եթե դիմենք ՍԴ, եթե այն գործիք չէ, ինքը հնարավորություն ունի մի անգամ իր պատմության ընթացքում ճշմարտությունն ասել»:
Րաֆֆի Հովհննիսյանը մարզերում հայտարում է, որ գյուղ առ գյուղ, քաղաք առ քաղաք իշխանությունը վերադարձվելու է ժողովրդին: Ուստի հարցին, թե ի՞նչ ճանապարհով, դա ենթադրում է մասնակցությո՞ն ՏԻՄ ընտրություններին՝նա պատասխանեց. «Մասնակցություն ամեն ինչին»:
ՀՀԿ-ն երեկ որոշել է, որ մասնակցելու է ավագանու ընտրություններին եւ Տարոն Մարգարյանի թեկնածությունն է առաջարկել: Հարցին՝ Դո՞ւք ինչպես եք պատրաստվում մասնակցել՝ նա պատասխանեց. «Մենք մասնակցության ձեւաչափը եւ բովանդակությունը կորոշենք այս համազգային ճգնաժամը լուծելուց հետո: Եթե չեղավ այն ձեւաչափը, որն ընդունելի է ժողովրդին, մենք մնացած բոլոր ընտրությունների մասնակցությունը կորոշենք դրանից հետո: Քաղաք առ քաղաք ժողովուրդը վերատիրանալու է իշխանության»:
Կարդացեք նաև
Հռիփսիմե ՋԵԲԵՋՅԱՆ
