«Առավոտ»ի հարգելի՛ խմբագրություն,
Խնդրում/պահանջում եմ ստորև դրված բաց նամակը հրապարակել Ձեր կայքում՝ որպես պատասխան Վահան Մարտիրոսյանի՝ փետրվարի 27-ին Ձեր կայքին տված հարցազրույցին:
Ո՞վ է անլուրջ՝ կույրը, խուլը և համրը, թե՞ դրա մասին պնդողը
«Առավոտ» օրաթերթի փետրվարի 27-ի համարում տպագրվել է Գոհար Հակոբյանի հարցազրույցը Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Վահան Մարտիրոսյանի հետ՝ «Կարելի է լուրջ երաժիշտների հրավիրել, ոչ թե կույր, խուլ ու համր» խորագրով, որի տեքստում էլ պրն Մարտիրոսյանի ուղղակի խոսքը մեջբերվում է հետևյալ կերպ՝ »Լուրջ մարդիկ կարող էին գալ, ոչ թե կույր, խուլ եւ համր»՝ ծաղրելով Բոչելիին՝ Հայաստան հրավիրելու հանգամանքը:
Կարդացեք նաև
Պարո՛ն Մարտիրոսյան, թեև ես, որպես շարքային ունկնդիր, ամենևին չեմ կիսում Ձեր կարծիքը Բոչելիի մասին, այնուամենայնիվ, ընդհանրապես չեմ հավակնում Ձեր նրբազգաց ճաշակն ուղղորդելու «անլուրջ» ուղղությամբ: Սակայն որպես շարքային քաղաքացի, ինչպես նաև կույր մարդ՝ ցավոք, պարտավորված եմ Ձեզ նման կրթված մարդուն ուղղորդելու դեպի ճշմարտության ճանապարհը, քանի որ Ձեր վերոնշյալ արտահայտությամբ Դուք ծաղրում և վիրավորում եք ոչ միայն Բոչելիին, այլ բոլոր կույրերին, խուլերին և համրերին:
Չգիտես ինչու, համոզված էի, որ պետական կամերային նվագախմբի նման խոշոր կառույցի ղեկավարը պետք է որ լավ սերտած լիներ դասական երաժշտության հսկաների կենսագրությունները, մասնավորապես՝ պետք է որ տեղյակ լիներ առնվազն Բախի կույր և Բեթհովենի խուլ լինելու փաստերի մասին, որպեսզի մտքով իսկ չանցներ գոնե այդ հիմքերով «անլուրջ» համարել կույրերին, խուլերին և համրերին: Բայց քավ լիցի, նույնիսկ դա իմ գործը չէ, ես այստեղ դասական երաժշտության պատմության քննություն չեմ վերցնում կամ չեմ ընտրում Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր:
Պարո՛ն Մարտիրոսյան, ճաշակն ու գիտելիքը մարդու սեփական որոշելու հարցերն են, սակայն երբ դրանք սկսում են ազդել էթիկայի վրա՝ վիրավորելով այլոց արժանապատվությունը կամ թյուր կարծիք թելադրելով, կողմնակի միջամտությունը դառնում է անհրաժեշտ: Այնպես որ ստիպված դառնալով այդ կողմնակի միջամտողը՝ բոլոր կույրերի, խուլերի և համրերի անունից ձեզնից պահանջում եմ հրապարակային ներողություն խնդրել Ձեր վերոնշյալ արտահայտության համար՝ կանխելով դրա բացասական ազդեցությունը հասարակության մեջ մեր մասին կարծիքի ձևավորման վրա:
Հ.Գ. կարող եմ Ձեզ սիրով օգնել ծանոթանալու բազմաթիվ տաղանդավոր կույրերի, խուլերի և համրերի հետ, որպեսզի Ձեր՝ խորհրդային մտածողությանը բնորոշ կարծրատիպերը համատեղ ուժերով կոտրենք:
Սիրով Ձեր կույր՝
Արտակ Բեգլարյան
