«Ժառանգությունը» քաղաքապետին հուշում է, որ կուսակցությունը վերելակ նորոգելու համար չէ:
«Ամոթանք տալու համար այդ մարդը երեւի բարեկրթությունից շատ հեռու է: Ամոթանք տալիս են այն դեպքում, երբ մարդը վատ բան է անում: Մենք որեւէ վատ բան չենք արել»,- Aravot.am-ի հետ զրույցում Րաֆֆի Հովհաննիսյանին եւ «Ժառանգությանն» ուղղված Մեղրիի քաղաքապետի ամոթանքին այսպես պատասխանեց «Ժառանգության» փոխնախագահ Արմեն Մարտիրոսյանը:
«Եթե ինքը չգիտի իր լիազորություները ու ոնց որ լրիվ խառնում ա սաղ, ուրեմն շատ վատ է: Դրա պատճառով է, որ համայնքապետը, մարզպետը, որը ընտրակեղծիքներով չի զբաղվում կամ չի ապահովում համապատասխան թվով կեղծված ձայներ՝ ինքն ազատվում է: Մեր ամբողջ երկիրը դարձել է կուսակցապետություն: Դրա համար նույնիսկ քաղաքապետը, որը շատ լավ պետք է իմանար, թե ով ինչ է պարտավոր անել, քաղաքապետը չի իմանում, թե ով ինչ պետք է անի: Իրեն թվում է՝ թե կուսակցությունը բարեգործական կազմակերպություն է, ընկերություն է կամ գործադիր իշխանություն է եւ ինքը պետք է զբաղվի վերելակ նորոգելով: Առաջին հերթին հենց ինքը՝ քաղաքապետը պետք է զբաղվի դրանով: Իր գործը ո՞ւմ վրա է գցում»,- ասաց պարոն Մարտիրոսյանը:
Նա նաեւ հեգնեց, որ «նմանատիպ, գործից չհասկացող մարդը, որը չգիտի իր լիազորությունները որոնք են, եւ այդ լիազորությունները կուսակցությունից է փորձում ստանալ, դեռեւս քաղաքապետ է: Մի հրաշալի կարճամետրաժ ֆիլմ գոյություն ունի՝ «Աշնան արեւ»: Այնտեղ մի արտահայտություն կա՝ ասում է՝ մեռնեմ, բարձրանամ տեսնեմ թե էս աշխարհը խի՞ է այսքան ծուռ: Հիմա իսկապես ծուռ է, լրիվ ծուռ: Սելի տեղ սելվորն է ճռռում»:
Կարդացեք նաև
Հռիփսիմե ՋԵԲԵՋՅԱՆ
