«Ամերիկայի ձայն» ռադիոկայան. ԱՄՆ-ի Սպիտակ տունն արձագանքել է իր կայքում Ղարաբաղյան հակամարտության և Խոջալուի ողբերգության մասին ադրբեջանական կողմի նախաձեռնած ստորագրահավաքին:
Հիշեցնենք, որ ստորագրահավաքին արձագանքել էր ավելի քան 100 հազար մարդ:
ԱՄՆ-ի Սպիտակ տունն իր կայքում հրապարակված պաշտոնական պատասխանում ափսոսանք է հայտնել Հայաստանի և Ադրբեջանի միջև պատերազմի ընթացքում զոհվածների համար:
«Քանի որ ԱՄՆ-ի նախագահի հատուկ հայտարարություն չի հրապարակվի, Միացյալ Նահանգները խորապես ցավում է Ադրբեջանի և Հայաստանի միջև պատերազմի ընթացքում մարդկանց ողբերգական մահվան համար», – ասված է հայտարարության մեջ:
«Դա հիշեցնում է բոլորիս, որ Լեռնային Ղարաբաղի հակամարտությունը չի կարող լուծվել ռազմական ճանապարհով, և որ տարածաշրջանում կայունություն, բարեկեցություն և հաշտեցում կարող է հաստատվել միմիայն հարատև և խաղաղ կարգավորման միջոցով: Որպես Մինսկի խմբի համանախագահ, Միացյալ Նահանգները հավատարիմ է մնում այդ ուղղությամբ բոլոր կողմերի հետ աշխատելուն», – եզրափակում է ստորագրահավաքին ԱՄՆ-ի նախագահի վարչակազմի կողմից հրապարակված հայտարարությունը:
Հիշեցնենք, որ այս խնդրին վերաբերող նման արձագանքով ավելի վաղ հանդես էր եկել ԱՄՆ-ի արտգործնախարարությունը:
Անդրադառնալով Խոջալուի ողբերգությանը վերաբերող հարցին՝ ԱՄՆ-ի արտգործնախարարության խոսնակ Վիկտորիա Նուլանդն ասել էր, որ Հայաստանի և Ադրբեջանի միջև պատերազմում կյանքի ողբալի կորուստը հիշեցնում է բոլորին, որ Լեռնային Ղարաբաղի հակամարտությունը չի կարող լուծվել ռազմական ճանապարհով:
«Տարածաշրջանում կայունություն, բարեկեցություն և հաշտեցում կարող է հաստատվել միմիայն հարատև և խաղաղ կարգավորման միջոցով: Որպես Մինսկի խմբի համանախագահ, հավատարիմ ենք մնում այդ ուղղությամբ կողմերի հետ աշխատելուն»,- նշել էր ԱՄՆ-ի արտգործնախարարության խոսնակ Վիկտորիա Նուլանդը:
