«Մենք չենք կարող թույլ տալ եւ հանդուրժել, որպեսզի քրեատարր էլեմենտները խոչընդոտեն մարդկանց կողմից կազմակերպվող հավաքները, միտինգները», այսօր խորհրդարանում պատասխանելով ՀԱԿ պատգամավոր Նիկոլ Փաշինյանին, ասաց վարչապետ Տիգրան Սարգսյանը:
Նիկոլ Փաշինյանը հիշեցրեց նախագահ Սարգսյանին ուղղված Սերժ Թանկյանի այն պնդումը, որ սա պետություն է եւ վկայակոչեց երեկ Արտաշատում Րաֆֆի Հովհաննիսյանի հանրահավաքի ժամանակ գրանցված միջադեպը, երբ որոշ մարդիկ փորձել էին նկարահանել հանրահավաքի մասնակիցներին:
Նիկոլ Փաշինյանը, ի գիտություն ԱԺ նախագահ Հովիկ Աբրահամյանի, նկատեց, որ Արտաշատը կարծես թե դառնում է քաղաքական իրադարձությունների կիզակետ՝ նկատի ունենալով նույն իրադարձությունները:
Հիշեցնենք, որ այսօր մամուլի ասուլիսում պատասխանելով լրագրողների համանման հարցին, Հովիկ Աբրահամյանն ասել էր, որ այն տեսանյութում, որն ինքը դիտել է լրատվական կայքերից մեկում, շատ պարզ երեւում է, թե ովքեր են սադրիչները:
Կարդացեք նաև
Նիկոլ Փաշինյանը նաեւ հարց հնչեցրեց այն մասին, որ Գեղարքունիքի մարզպետ Ռաֆիկ Պետրոսյանը մարզպետարանի պաշտոնական կայքէջում տվյալներ է հրապարակել ընտրությունների արդյունքների մասին եւ շնորհակալություն հայտնել իր այն աշխատակիցներին, ովքեր կարողացել են լավ արդյունք ապահովել Սերժ Սարգսյանի համար: Փաշինյանը հետաքրքրվում էր՝ եթե Հայաստանը պետություն է, որեւէ մեկը պատասխանատվություն պիտի՞ կրի սրա համար:
Վարչապետ Տիգրան Սարգսյանը, որը պատասխանեց Նիկոլի հարցին, պարզվեց՝ տեղյակ չէր մարզպետի այդօրինակ գործունեությունից, ասաց, որ կճշտեն եւ համապատասխան միջոցներ ձեռք կառնեն: Իսկ ընդհանուր առմամբ՝ վարչապետը գովեց պետական մարմիններին, այդ թվում՝ նաեւ ոստիկանության աչալուրջ աշխատանքը անցած ընտրությունների ժամանակ եւ հետընտրական այս գործընթացներում:
Նելլի ԳՐԻԳՈՐՅԱՆ
