Իսկ ԱՊՊԱ-ն նախկին հարսից գումար է պահանջում ամուսնու հոր վթարի համար:
Աջափնյակ եւ Դավիթաշեն վարչական շրջանների ընդհանուր իրավասության դատարանի դատավոր Մարգարիտա Հարթենյանի նախագահությամբ այսօր սկսվեց «Նաիրի Ինշուրանս» ապահովագրական ընկերության հայցի քննությունն ընդդեմ Մարինա Առաքելյանի՝ 3 միլիոն 999.600 ՀՀ դրամի պահանջի մասին:
Մարինա Առաքելյանի անունով ապահովագրված «Ֆոլքսվագեն Ջետտա» ավտոմեքենան վարել է նախկին ամուսնու հայրը՝ Մանվել Ավետիսյանը: 2011թ. սեպտեմբերին Արտաշատ-Երեւան ճանապարհին մեքենան ընկել է ձորը, ուղեւոր Արփիկ Հախվերդյանը մահացել է, իսկ ավտոմեքենայում գտնվող 4 ուղեւորներն էլ մարմնական տարբեր աստիճանի վնասվածներ են ստացել, հայտնվել հիվանդանոցներում:
Ոստիկանության Արարատի մարզի քննչական բաժնում հարուցվել է քրեական գործ, սակայն այստեղ որպես վկա ոչ միայն չի կանչվել Մարինա Առաքելյանը, ում անունով էր ԱՊՊԱ-ում ապահովագրված ավտոմեքենան, այլ քրեական գործի վարույթը կարճվել է՝ «իրադրության փոփոխման» հիմքով:
Կարդացեք նաև
Ապահովագրական ընկերության ներկայացուցիչը դատարանում հայտնեց, որ ավտոտրանսպորտային միջոցների օգտագործումից բխող պատասխանատվության պարտադիր ապահովագրական վկայագրով լիազորված տիրապետողներ են գրանցվել Մարինա Առաքելյանն ու Վարուժան Ավետիսյանը /Վերջինը թողել է ընտանիքը՝ երեխաներով, ամուսնացել եւ մեկնել է հանրապետությունից դուրս-Ռ.Մ./:
Հայցապահանջում ապահովագրական ընկերությունը փաստել էր վարորդի՝ Մանվել Ավետիսյանի այն գործողությունները, որոնք հանգեցրել են պատահարին, բայց նաեւ արձանագրել էր, թե «ապահովադիր» Մարինա Առաքելյանը խախտել է «Ավտոտրանսպորտային միջոցների օգտագործումից բխող պատասխանատվության ապահովագրության մասին» ՀՀ օրենքը, «մեքենան վստահելով վկայագրում որպես լիազորված տիրապետող չնշված անձի»:
Մարինա Առաքելյանի ներկայացուցիչը դատարանում առարկեց ապահովագրական ընկերության փաստարկների դեմ, հղում արեց Արարատի մարզում կարճված քրեական գործի փաստական բոլոր հանգամանքներին, հարցնելով, թե որտեղ է գրված, թե Մարինան կրում է պատասխանատվություն, որ այս գործով անգամ նա չի հրավիրվել որպես վկա, բացի այդ, նախաքննության մարմինը չի հետաքրքրվել, թե ինչպես է մեքենան հայտնվել նախկին սկեսրայրի մոտ. «Գուցե գողացվա՞ծ է»:
Ըստ ԱՊՊԱ-ի՝ տուժողի հուղարկավորության ծախսերը հատուցվում են օրինական ուժի մեջ մտած դատական ակտով սահմանված չափով, մինչդեռ դատական ակտ չկա:
Քաղաքացիական, քրեական, վարչական գործ հարուցված չլինելու դեպքում, հայցվորի պնդմամբ, տուժողի հուղարկավորության հետ կապված ծախսերը գնահատվում են 650 000 ՀՀ դրամ, որը հատուցվում է միանվագ կերպով:
Սահմանված գումարը վճարվում է «ապահովագրական հատուցում ստանալու դիմում ներկայացրած այն անձին, ով առաջին անգամ ներկայացրել է տուժողի մահվան վկայականի բնօրինակը»:
Մահվան վկայականն էլ ներկայացրել է Վարուժան Ավետիսյանը:
Ապահովագրական ընկերությունը հատուցում է տվել Վարուժան Ավետիսյանին, որպես…տուժողի: Այդ մասին «ապահովադիրը» տեղյակ չի եղել, չեն ծանուցել անգամ:
Էրեբունի բժշկական կենտրոնի տեղեկանքի հիման վրա էլ մեկ այլ տուժողի՝ Գ. Ավետիսյանին է հատուցվել վնասի դիմաց:
Իսկ ուղեւոր Նազիկ Մելքոնյանի բուժման ծախսերը գնահատվել է 3 միլիոն դրամ, որը վճարվել է հենց բուժկենտրոնին՝ ապահովագրական ընկերության կողմից:
Ապահովագրական ընկերության այն փաստարկին էլ, թե Մարինա Առաքելյանին ծանուցել են, վերջինի ներկայացուցիչը, երբ խնդրեց ծանուցումների կտրոնները, ապահովագրական ընկերության ներկայացուցիչն ասաց՝ չեմ տիրապետում դրանց:
Ռուզան ՄԻՆԱՍՅԱՆ
