Վերջին 2 տարիներին Անկախ մշտադիտարկման խումբը այցելություն է իրականացրել 32 հատուկ դպրոցներ եւ պատրաստել 2 զեկույց, որոնք, ըստ ՅՈՒՆԻՍԵՖ-ի, բավարար տեղեկություն չեն տալիս այդ հաստատություններում երեխաների իրավունքների ոտնահարման մասին:
Հայաստանի մանկատներում եւ գիշերային խնամքի կենտրոններում ապրող, ինչպես նաեւ հատուկ դպրոց հաճախող երեխաները բռնության եւ անտեսման առավել մեծ ռիսկի տակ կարող են լինել: Այսօր ՄԱԿ-ի գրասենյակում տեղի ունեցած միջոցառման ժամանակ ասաց ՅՈՒՆԻՍԵՖ-ի հայաստանյան գրասենյակի ներկայացուցիչ Հենրիետ Արիենսը:
ՅՈՒՆԻՍԵՖ-ի եւ ՀՀ-ում գործող Գերմանիայի դեսպանության միջեւ այսօր ստորագրվեց համագործակցության պայմանագիր, ըստ որի, Գերմանիայի դեսպանությունը կտրամադրի 65000 եվրո` Հայաստանում երեխաների խնամքի հաստատություններին:
Մամլո ասուլիսին ներկա էր նաեւ կրթության եւ գիտության (ԿԳ) փոխնախարար Մանուկ Մկրտչյանը: Ըստ նրա. «Շատ կարեւոր է, որ երեխաները զգան, որ իրենցով ոչ միայն կազմակերպություններն են հետաքրքրվում, այլ տարբեր կազմակերպություններ նույնպես ընդգրկված են այս հոգատարության գործընթացում»:
Ըստ Գերմանիայի դեսպան Ռայներ Մորելի, այսպիսի խնդիրներ կան գրեթե բոլոր երկրներում եւ Գերմանիան նույնպես բացառություն չէ. «Թերեւս գիտեք, որ մարդու իրավունքների պաշտպանությունը մեր քաղաքականության մեջ գերակա ուղղություն է….: Շատ դրական եմ համարում, որ այս նախաձեռնությունը ունեք եւ առաջ եք տանում»:
Կարդացեք նաև
Հենրիետ Արիենսը նշեց, որ նախաձեռնության իրակացումը շարունակական գործընթաց է եւ այն կսկսվի պայմանագիրը ստորագրումից անմիջապես հետո:
ՅՈՒՆԻՍԵՖ-ի տվյալներով, այսօր խնամքի հաստատություններում ապրող երեխաների թիվը հասնում է մոտ 5000-ի, իսկ երեխաների՝ հաստատություններում տեղավորվելու վնասակար հետեւանքները ապացուցվել են բազմաթիվ հետազոտողների կողմից:
Հայաստանում ֆինանսավորվող ներկայիս ծրագրի նպատակն է բարելավել երեխաների իրավունքների պաշտպանությունը խնամքի հաստատություններում:
Նշենք, որ երեխայի խնամքի հաստատությունների Անկախ մշտադիտարկման խումբը ստեղծվել է 2010թ. ՀՀ ԿԳ նախարարի հրամանով: Վերջին երկու տարիներին Անկախ մշտադիտարկման խումբը այցելություն է իրականացրել 32 հատուկ դպրոցներ եւ պատրաստել 2 զեկույց, որոնք, ըստ ՅՈՒՆԻՍԵՖ-ի, բավարար տեղեկություն չեն տալիս այդ հաստատություններում երեխաների իրավունքների ոտնահարման մասին:
Սուսաննա ՕՀԱՆՅԱՆ
