Հարցազրույց հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանի հետ
– Թեհրանում մեր ըմբիշների մասնակցությունից գո՞հ մնացիք:
– Ընդհանուր առմամբ՝ այո: Այն առումով, որ մեր հավաքականի առաջատարները չէին մասնակցում: Իսկ 2-րդ եւ 3-րդ կազմերով աշխարհի տասը ուժեղագույն երկրների մեջ թիմային 4-րդ տեղ գրավելը վատ չէ: Մանավանդ, որ մյուս երկրները ժամանել էին ուժեղագույն կազմերով: Մենք ընդգրկել էինք այն տղաներին, որոնք նոր օլիմպիական ցիկլում պետք է կարողանան դրսեւորել իրենց, ապացուցեն, որ արժանի են հավաքականի հիմնական կազմում իրենց տեղն ունենալ: Իրանում թերություններ, իհարկե, նկատվեցին: Հիմա եւ սրանից հետո պետք է աշխատենք, որպեսզի օլիմպիական ցիկլի վերջնամասում այդ թերությունները բացառվեն կամ նվազագույնի հասցվեն:
– Անդրադառնանք սպորտային ըմբշամարտի օլիմպիական ճակատագրին: Իրան մեկնելուց առաջ հայտարարել էիք, թե պատրաստվում եք մասնակից ըմբշամարտի տասը գերտերությունների հետ միասին համատեղ հայտարարության կամ նամակի տեքստ պատրաստել եւ ուղարկել ՄՕԿ, ստացվե՞ց:
Կարդացեք նաև
– Հենց առաջին օրը հրավիրված ժողովի ժամանակ ես այդ հարցը բարձրացրի՝ նշելով, որ ոչ միայն ազգային ֆեդերացիաները, այլեւ աշխարհում ճանաչված ըմբիշները պետք է օրինական ճանապարհներով քայլեր կատարեն: Ընդունեցին բոլորը: Անմիջապես որոշվեց համապատասխան պլակատ հրատարակել՝ «Օլիմպիական խաղերն առանց ըմբշամարտի հնարավոր չէ» կոչով: Ճիշտ է, տեխնիկական պատճառներով այն մեր մրցումների օրերին հնարավոր չեղավ պատրաստել, սակայն մեզանից հետո՝ ազատ ոճի ըմբիշների Աշխարհի գավաթի խաղարկության ժամանակ, այն արդեն պատրաստ էր: Լուսանկարն էլ, որքան գիտեմ, տեղադրված է համացանցում. բոլոր երկրների ըմբիշները միասին այն պահել են գլխավերեւում: Եվ կարեւորը գիտե՞ք որն է: Այն, որ սպորտը ոչ միայն իսկապես դուրս է քաղաքականությունից, այլեւ միավորում է քաղաքական դաշտի հակառակ բեւեռներում գտնվող երկրներին ու մարդկանց: Այդ պլակատը միավորել է անգամ ամերիկացի եւ իրանցի ըմբիշներին:
– Ձեռնարկվող քայլերն ու ակցիաները ցանկալի օգուտ կտա՞ն:
– Վստահ եմ՝ անպայման: Օրինակ, Բուլղարիայի ըմբշամարտի ֆեդերացիայի նախագահը, նախկին ըմբիշ, արդեն հրաժարվել է իր օլիմպիական մեդալից՝ այն ուղարկելով ՄՕԿ: Իսկ մեր օլիմպիական չեմպիոն Արմեն Նազարյանը հայտարարել է, թե ըմբշամարտն օլիմպիական խաղերից հանելու դեպքում հացադուլ կհայտարարի: ՄՕԿ-ի համաժողովը չի կարող անտեսել այս եւ մնացած բոլոր լուրջ ակցիաները:
– Ադրբեջանը, որ Ռաֆայել Մարտինետիի օրոք ՖԻԼԱ-ի գլխավոր հովանավորն է եղել, նրա հեռացվելուց հետո իրեն ինչպե՞ս էր զգում:
– Արտառոց ոչինչ չեմ նկատել: Ինձ չէր էլ հետաքրքրում: Ես զբաղված էի մեր տղաներով: Միայն մի բան կարող եմ ասել. ադրբեջանցիներն Աշխարհի գավաթի այս խաղարկությունում վատ հանդես եկան եւ, եթե չեմ սխալվում, գրավեցին թիմային 7-րդ տեղը:
– Լոնդոնում Արսեն Ջուլֆալակյանի գլխավոր մրցակիցը՝ Ռոման Վլասովը, օրերս հայտարարել էր, թե Ռուսաստանի հավաքականի գլխավոր մարզիչ Գոգուաշվիլին իրեն պարտադրել է մասնակցել Եվրոպայի առաջնությանը: Արսենի մասին ի՞նչ կասեք:
– Դեռ այս տարվա սկզբից մենք որոշել ենք, որ Արսենը Եվրոպայի առաջնությանը չի մասնակցելու, այլ նախապատրաստվելու է աշխարհի առաջնությանը: Այդպես մենք վարվել ենք, ինչպես ասացի, որպեսզի մյուսներն էլ մրցափորձ ձեռք բերելու եւ իրենց դրսեւորելու հնարավորություն ունենան նոր սկսված օլիմպիական ցիկլում:
– Ռոման Ամոյանի ու Յուրի Պատրիկեեւի մասին նոր բան չունե՞ք ասելու:
– Ռոմանը շարունակում է մարզվել: Նա նույնպես պատրաստվում է աշխարհի առաջնությանը: Իսկ Պատրիկեեւի մասին արդեն գիտեք: Նա դեռ իր մարզական կարիերայի մասին վերջնական որոշում չի կայացրել:
ԱՇՈՏ ՀԱԿՈԲՅԱՆ
«Առավոտ» օրաթերթ
