Այսօր «Մեդիա կենտրոնում» Հայաստանի Հելսինկյան կոմիտեի ղեկավար Ավետիք Իշխանյանը ներկայացրեց կոմիտեի իրականացրած դիտորդական առաքելության վերջնական արդյունքները:
Դիտորդություն անելը բավականին բարդ գործ է, նշեց Իշխանյանը հավելելով, որ դժվար է գտնել մարդկանց, որոնք կարող են լինել անաչառ, չգայթակղվող եւ համարձակ. «Հայաստանում դիտորդություն անելը նշանակում է այս ամենի հանրագումարը ու այդքան մարդ գտնելը դիտորդության համար` դժվար է»:
Դիտորդական առաքելությունն անցկացվել է Աջափնյակ վարչական շրջանում 2013 թվականի փետրվարի 18-ին, ՀՀ նախագահական ընտրությունների օրը: Աշխատել են 104 դիտորդ: Իշխանյանի փոխանցմամբ`«Եղել են դեպքեր երբ նույնիսկ ահաբեկել են, բայց հետո ամեն ինչ հարթվել է: Բոլոր ընտրատեղամասերի տերերը Սերժ Սարգսյանի վստահված անձինք էին, ու դա միանգամից զգացվում էր, թե ով է տվյալ տեղամասի դիրիժորը: Ուղղորդումների եւ ընտրակաշառքի դեպքեր են արձանագրել, ինչի հետ կապված քրեական գործ է հարուցվել: Մեր դիտորդների շնորհիվ հնարավորինս կոպիտ խախտումներ չեն եղել: Մեր գնահատականն այն է, որ եղել են կոպիտ խախտումներ եւ ասել, թե միջազգային չափանիշներին համապատասխան ընտրություններ են եղել` չեմ կարող ասել»:
Դիտորդը լսել է, թե օրինակ 6/12 ընտրատեղամասում ինչպես է Սերժ Սարգսյանի վստահված անձը երկու կնոջ 40 հազար դրամ առաջարկում: 6/14-ում` երկու հոգի զանգել են տարբեր հեռախոսահամարներով եւ մարդկանց ուղղորդել, որ գնան ոմն Գագիկ Խաչատրյանից ստանան 5000-ական դրամները: 6/15 տեղամասում Սերժ Սարգսյանի վստահված անձ Արշակ Շահնազարյանը ընտրողներին ուղղորդել է գրանցման սեղանի մոտ, քաղաքացիներին հուշել եւ այլն:
Կարդացեք նաև
Aravot.am-ի հարցին պատասխանելով, Ավետիք Իշխանյանը նշեց, որ ԿԸՀ-ի վերջնական արդյունքներն իր համար սպասելի էին, որովհետեւ առանձնապես տարբերություն չկար. «ԿԸՀ-ն մի կողմից կարող է արդարանալ, որ ինքը միայն ամփոփում է արդյունքերը, իհարկե կարող էր վերահսկողություն սահմանել: Ես այդ արդյունքներին սպասում էի այնպես, ինչպես, որ միշտ եղել է Հայաստանի պատմության մեջ: Հայաստանում որեւէ անկախ մարմին չկա, սկսած դատարաններից, իսկ ինձ համար այս ընտրություններն ընդունելի չեն: Բայց մի բան պարզ է` Րաֆֆի Հովհաննիսյանը ցույց տվեց, որ կարելի է ավելի քիչ ռեսուրսներով պայքարել ու հասնել լավ արդյունքի»,- ասաց Իշխանյանը՝ նշելով, որ համոզված է՝ Րաֆֆի Հովհաննիսյանն ավելի շատ ձայն է հավաքել, քան Սերժ Սարգսյանը:
Եվա ՀԱԿՈԲՅԱՆ
