Ինչպես եւ սպասվում էր, խորհրդարանական հայտարարություններն այսօր մեծամասամբ վերաբերվեցին փետրվարի 18-ին կայացած նախագահական ընտրություններին: Մինչ ընտրական գործընթացներին անցնելը, «Ժառանգության» պատգամավորներ Թեւան Պողոսյանը, Ռուբիկ Հակոբյանը եւ Զարուհի Փոստանջյանը իրենց խոսքը սկսեցին այսպես՝ «Բարեւ», ապա քննադատեցին իշխանություններին՝ կեղծված ընտրությունների համար:
Ի դեպ, երբ Զարուհի Փոստանջյանը մոտենում էր խոսափողին, ԱԺ հանրապետական փոխնախագահ Էդուարդ Շարմազանովը իր նստած տեղից տիկին Փոստանջյանին հուշում էր՝ «Չմոռանաք բարեւել»:
Կեղծված եւ կանխորոշված արդյունքով նախագահական ընտրությունները քննադատեց նաեւ ՀԱԿ խմբակցության պատգամավոր Ստեփան Դեմիրճյանը, որը երկարատեւ հիվանդությունից հետո ապաքինվել է եւ վերադարձել խորհրդարանական աշխատանքին:
ՀՅԴ-ն ներկայացնող պատգամավոր Արմեն Ռուստամյանի զարմանքն էլ ուղղված էր համայնքապետերի եւ մարզպետի հրաժարականներին, որոնք հետեւեցին նախագահական ընտրություններին: Ռուստամյանը չի հասկանում, թե ինչ կապ ունի համայնքապետը ընտրությունների ժամանակ որեւէ թեկնածուի օգտին ձայներ ապահովելու հետ: Արմեն Ռուստամյանը նաեւ ասաց, որ Դաշնակցությունը պատրաստ է կանգնել ժողովրդի կողքին եւ գործել ի շահ ժողովրդի:
Կարդացեք նաև
Նելլի ԳՐԻԳՈՐՅԱՆ
