Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Վահան Մարտիրոսյանը պատասխանելով Aravot.am-ի հարցին, թե ի՞նչն է ստեղծագործելիս խթանում իր ոգեւորությունը եւ ի՞նչը զայրացնում, ասաց. «Զայրացնում է հատկապես ոչ պրոֆեսիոնալիզմը: Հասկանալի է, որ Հայաստանում ստեղծագործող երաժիշտը տնտեսական, սոցիալական եւ այլ խնդիրներ ունի, բայց մի՞թե դա կապ ունի լավ նվագելու հետ: Դա նույնն է, որ ֆուտբոլի մասին ասում են՝ մերոնք լավ չեն խաղում, որովհետեւ քիչ են վաստակում: Իսկ ի՞նչ փող է պետք գնդակի հետեւից ավելի արագ վազելու համար: Դա փողի հետ կապ ունի՞…»:
Նա այն կարծիքին է, որ Հայաստանի պետական կամերային նվագախումբը բարձրակարգ նվագախումբ է եւ ոչնչով չի զիջում «կուշտ»երկրների նմանօրինակ կոլեկտիվներին. «Այլ հարց է, որ պիտի միջոցներ գտնել, որպեսզի լավագույն երաժիշտները չհեռանան Հայաստանից, իսկ կոնսերվատորիայում ուսանել ցանկացողները հավատան, որ երաժիշտ դառնալով լավ են ապրելու: Էլի շնորհակալ ենք Սերժ Սարգսյանին, որ մեկ տարի է՝ մեր նվագախումբը փրկել է կործանումից, ավելացրել ֆինանսական հնարավությունները: Մեր ցանկությունն է՝ դրանք ավելի մեծանան, որպեսզի կարողանանք ավելի հաճախ լավ երաժիշտներ հրավիրել: Նման հրավերները հայ ունկնդրին 10 անգամ ավելի օգուտ կբերեն, քան Բոչելիին հրավիրելը, որի վրա վրա մեկ միլիոն ծախսեցին: Լուրջ մարդիկ կարող էին գալ, ոչ թե կույր, խուլ եւ համր՚»:
Զրույցի մանրամասները՝ վաղվա տպագիր «Առավոտում»:
Գոհար ՀԱԿՈԲՅԱՆ
