Րաֆֆի Հովհաննիսյանին մեղադրում են, որ նախագահին չի ասել՝ այո, տխուր եմ, որ ձայներս տարել ես
Մասիսում Րաֆֆի Հովհաննիսյանի բարեւարշավն անցավ շատ բուռն, ինչպես եւ սպասվում էր: Ժառանգության առաջնորդը նախապես հայտարարել էր, որ գնում է «կեղծիքների կենտրոն»:
Բավականին հոծ բազմություն էր հավաքված եւ ամեն քայլափոխի՝ մահակներով ոստիկաններ ու ոստիկանական մեքենաներ, որոնք տեսախցիկներով նկարահանում էին հավաքված մարդկանց:
Մի մարդ՝ Վարդան անունով Րաֆֆի Հովհաննիսյանին մոտեցավ ու դժգոհեց Սերժ Սարգսյանի հետ հանդիպման ժամանակ նրա պահվածքից. «Լրագրողների հետ շրջում եք, որ լուսաբանվի, չէ՞: Նախագահի հետ հանդիպելուց ինչի՞ լրագրողներին չթողեցիր, եթե ճիշտ մարդ ես: Ձեզ նախագահը հարցրեց՝ Րաֆֆի, խի՞ ես տխուր: Ասեցիր՝ տխուր չեմ: Ասեիր՝ տխուր եմ, որ ձայներս տարել ես, եթե ըտենց ա»: Րաֆֆի Հովհաննիսյանը հորդորեց ճիշտն ասել, քանի որ այդպես չի եղել. «Երբ ասեց՝ ես տխուր եմ, ի՞նչ պատասխանեցի: Դուք հիմա հերոսանում եք: Ոոոո՜չ, ես ասացի՝ իրավատեր եմ, իրավազոր: Այնպես որ, դուք ճշմարտությունն ասեք: Ես կողմ էի բաց հանդիպումների, եւ եթե պարոն Սարգսյանը երբեւէ նորից այս շաբաթվա ընթացքում եւ առաջիկայում ինձ հրավիրի այս համազգային տագնապը լուծելու համար, ես կպահանջեմ, ինչպես պահանջեցի անցած անգամ, որ բաց հանդիպում լինի»:
Կարդացեք նաև
Հավաքի մասնակիցներից մեկը սկսեց բղավել, որ ոստիկանները թող լավ էլ հետեւեն, նկարեն, սպառնան, մեկ է, վախեցողը չեն: Aravot.am-ի հարցին՝ այստեղ՝ Մասիսում շա՞տ են կեղծիքներ եղել, մասիսցիներից մեկը՝ Արտակ Ստեփանյանը պատասխանեց՝ «37 թիվն էր, հեսա էս ասելուց հետո գալու են բռնեն-տանեն»: Նա նաեւ պատմեց, որ իր պատճառով ճնշումներ են գործադրում իր հարազատների վրա. «Տղայիս ստիպել են, որ մտնի ՕԵԿ, եկավ ասեց՝ պապա, ասում են պետք ա մտնես կամ դուրս գաս: Հո ապուշ չէր՝ մտներ»:
Հռիփսիմե ՋԵԲԵՋՅԱՆ
