Արմավիրում Րաֆֆի Հովհաննիսյանը կոչ արեց պատրաստվել երկարատեւ պայքարի
«Ոտներդ խերով լինի Հայաստանի մեջը, բարով ես եկել»,- Րաֆֆի Հովհաննիսյանին այսպես ողջունեցին Արմավիրում: Մի կին մոտեցավ ելույթի ժամանակ «Ժառանգության» առաջնորդին ու բողոքեց, որ Արմավիրի փողոցները «աղքատի կարկատան» են եղել: Րաֆֆի Հովհաննիսյանը վստահեցրեց՝ «Էլ ոչ մի աղքատություն, ոչ մի արտագաղթ: Չամաչեք, չվախենաք: Մենք բոլոր գյուղերում ասել ենք, որ սա մեր քաղաքն է, մեր գյուղն է: Մեր քաղաքը ոչ մեկի սեփականությունը չէ: Ով թալանեց, ով վախեցրեց, ինքը պատասխան պիտի տա»:«Հա, մեռնեմ արեւիդ»,- արձագանքում էին արմավիրցիները:
Րաֆֆի Հովհաննիսյանի խոսքերով՝ «Ձեր քաղաքապետը ունեցավ գոնե նվազագույն տղամարդկությունը՝ հրաժարական տվեց: Ես ողջունում եմ: Նա հրաժարական պիտի տար ոչ թե նրա համար, որ ժողովուրդը հաղթեց, այլ՝ որ խախտումներ արեց: Ես իր օրինակով պահանջում եմ նաեւ ավագանու եւ մարզպետի հրաժարականը: Դա ոչ թե ուլտիմատում է, ժողովրդի պահանջն է: Այդ պահանջը պետք է տանենք մինչեւ հաղթանակ: Ժողովուրդը հաղթել է, խոսել է, երգել է, ասել է՝ ոչ կեղծիքին»:
Կարդացեք նաև
Արմավիրցիներցի մի պապիկ դժգոհեց. «Սաղ փախան ախր, գնացին»: Րաֆֆի Հովհաննիսյանը ուղղեց. «Փախածները չեն փախել, իրենց ցավով են գնացել: Տուն առ տուն մեր ժողովրդին հետ պիտի բերենք Հայաստան: Պատրաստվեք երկարատեւ պայքարի եւ հաղթանակը մերն է լինելու»:
Րաֆֆի Հովհաննիսյանի հավաքին հետեւում էին ոստիկանները, բայց այս անգամ որեւէ միջամտություն չեղավ:
Հռիփսիմե ՋԵԲԵՋՅԱՆ
