ՀՀԿ պատգամավորի համար բիրտ ուժ կիրառելը միայն «դուբինկաները», զենքը եւ ջրցան մեքենաները չեն
ՀՀԿ խմբակցության քարտուղար Հովհաննես Սահակյանը օրերս «Ազատություն» ռ/կ-ին ասել էր, որ իշխանությունն այսօր դեռեւս որեւէ բիրտ ուժ չի կիրառում, թեպետ դրա իրավունքը ունի»:
Այսօր Aravot.am-ը նրանից հետաքրքրվեց, թե իշխանությունները դրանով լավությո՞ւն են անում մարդկանց, որ բիրտ ուժ չեն կիրառում, թե՞ պարզապես այդ խոսքերով ուզում եք զսպել ընդդիմությանը: Նա պատասխանեց. «Ես, որպես իրավաբան, կարող եմ լայն դասախոսություն կարդալ բիրտ ուժ կիրառելու հնարավորությունների եւ չհնարավորությունների մասին, ճշտի եւ սխալի մասին: Կարող եմ բացատրել, թե ինչ է նշանակում բիրտ ուժ կիրառելը կամ ուժ կիրառելը: Ուժը երբեք քնքուշ, պուպուշ չի լինում: Ուժը լինում է կոշտ: Ինձ համար բիրտը նշանակել է կոշտ: Եթե բիրտ բառը սխալ եմ ընտրել, դրա համար կարող եմ ներողություն խնդրել հանրությունից»:
Մենք ճշտեցինք այսինքն, պիտի ժողովրդի վրա զե՞նք կիրառեին՝ նա հստակեցրեց. «Չէ, բիրտ չպետք է հասկանալ միայն զենք: Օրինակ, թույլ չտալ, որպեսզի հանրահավաք իրականացնեն»: Մեր հարցին՝ ի՞նչ մեթոդներով թույլ չտալ՝ դուբինկաներո՞վ՝ նա պատասխանեց. «Եթե ձեր համար թույլ չտալը միայն դուբինկաներով է, թող լինի նաեւ դուբինկաներով: Բայց ինձ համար դուբինկան, զենքը, ջրցան մեքենան, փշալարերը չեն: Ընդամենը կարող են թույլ չտալ եւ չմասնակցել: Թեկուզ ոստիկաններով պատ կառուցելով: Այնուամենայնիվ, բիրտ ուժի հետ կապված մի փոքր էքսկուրս անեմ, քանի որ լրագրողական կազմից էլ եղան մարդիկ, ովքեր փորձեցին քննադատել: Ի գիտություն, եթե պետք լինի, դասախոսություն կկարդամ: Հարկադրանքի ուժ կիրառելու միակ բացառիկ իրավունքը պետության եւ պետական իշխանության մենաշնորհն է: Տեսության մեջ պետությունը եւ իշխանությունը տարանջատվում է, բայց պրակտիկայում պետական իշխանությունը նույնականացվում է: Քաղաքացիական հասարակության տարր հանդիսացող հասարակական կազմակերպությունը չի կարող ուժ կիրառել: Իսկ պետությունը ուժը կիրառում է, երբ որ համընդհանուր նորմի կանոնները խախտվում են՝ օրենք, իրավունք: Այս դեպքում, եթե խախտվի, պետական իշխանությունն իրավազոր է ուժ կիրառել: Դեռ մենք հանդուրժող ենք: Մենք ասելով՝ նկատի ունեմ պետական իշխանությունը»:
Կարդացեք նաև
Մեր հարցին՝ իսկ ի՞նչ պիտի լինի, որ հանդուրժող չլինեք՝ նա պատասխանեց. «Այ, օրինակ, երբ մեջը կա պրովոկացիա, նկատի ունեմ Ազատության հարթակում տեղի ունեցող այն գործընթացները, երբ «Ժառանգության» եւ ինչ-որ ակտիվիստների մեջ եղավ: Եթե այդտեղ ինչ-որ մի խնդրի պատճառով լիներ անդառնալի հետեւանքներ, մարմնական վնասվածքներ, պատասխանատվությունն ո՞ւմ վրա էր լինելու: Ասելու էիք, որ ոստիկանները տեղում էին եւ չկանխեցին»:
Ինչ վերաբերում է Սպիտակում, Ապարանում ոստիկանների միջամտությանը եւ համաքաղաքացիներին ուղղված կոչին, որ հավաքն ապօրինի է, Հովհաննես Սահակյանը նկատեց, որ ոստիկանությունն իր գործն է արել. «Ոչ թե հավաքվածների դեմքերն է նկարում, այլ ընդհանուր պրոցեսը, որ պրովոկացիայի ժամանակ ունենան փաստեր: Դրանք այլ են»:
Հռիփսիմե ՋԵԲԵՋՅԱՆ
Աստվածաշնչյան Սոդոմ Գոմորի իրավիճակում ենք, միայն թե էստեղ հարցը այն է, թե ցույց տվեք իշխող վարչակազմում գոնե տասը մասնագետ, գրագետ պաշտոնյա, որպեսզի ուզենանք այս վարչակազմը պահել: Չենք ասում դիպլոմ ցույց տվեք, դրանք ամեն քայլափոխին վաճառվում են…