ԱԺ-ում քննարկվում է «Պետական կենսաթոշակների մասին օրենքում փոփոխություններ եւ լրացումներ կատարելու մասին օրինագիծը, որով առաջարկվում է, որ թոշակառուները լիազորագրով մեկ տարի անընդմեջ կարող են ստանալ իրենց թոշակները, բայց տարվա ընթացքում 1 անգամ անպայման պետք է այցելեն բանկ:
Նշենք, որ նախկինում այս օրենքում նշված էր, որ թոշակառուի լիազորագիրը պետք է հաստատի նոտարը: Հետո առաջարկվեց, որ լիազորագիրը կարող է հաստատել ցանկացած նոտար, այդ թվում՝ արտերկրից, որպեսզի թոշակառուն կարողանա, ասենք, Մոսկվայում գտնվելով՝ չզրկվել իր թոշակից:
Այսօր օրինագծի քննարկման ընթացքում ՀՅԴ պատգամավոր Արծվիկ Մինասյանը աշխատանքի եւ սոցիալական հարցերի նախարար Արտեմ Ասատրյանից հետաքրքրվեց. «Երկու կենսաթոշակների մասին օրենք: Քայլեր ձեռնարկեք, որ մեկ օրենք դառնա, ոչ թե երկու նույն անվանումներով օրենք: 35-րդ հոդվածում կատարված փոփոխության համաձայն՝ ստիպում եք, որ թոշակառուն առնվազն տարին մեկ անգամ պետք է գնա բանկ: Ի՞նչն է պատճառը, որ քաղաքացուն պարտադրում եք ելնի գնա առեւտրային բանկ: Կենսաթոշակները դադարեցնելը, վերսկսելու համար էլ կա՞ արդյոք միջազգային փորձ ու սահմանափակումներ՝ թոշակառուն երկրո՞ւմ է ապրում, թե՞ բացակայում է երկրից»:
Արտեմ Ասատրյանը պատասխանեց, որ կառավարությունը էապես բարելավել է քաղաքացիներին մատուցվող ծառայությունները: Օրինակելի պայմանագրեր են հաստատվել. «Երբ գումարը փոխանցվում է, նոր համարում ենք, որ կենսաթոշակը վճարված է: Հաշվի առնելով, որ կան նաեւ ռիսկեր, իսկ դրանք չեն կարող 100 տոկոսով կառավարվել, դրա համար պետք է ամրագրել քաղաքացուն տարեկան մեկ անգամ բանկ հաճախելու պարտավորությունը: Քանի որ կանխիկ վճարման դեպքում քաղաքացուն ամեն ամիս տեսնում է փոստատարը, անկանխիկ վճարման դեպքում պահանջը դա է, որ քաղաքացին տարեկան մեկ անգամ այցելի բանկ»:
Կարդացեք նաև
Արծվիկ Մինասյանը բացատրությունը չընդունեց. «Ստիպում եք, որ անպայման թոշակառուն գնա բանկ, դա մի քիչ լուրջ չի: Արգելում եք, սահմանափակում եք նրա անցած ամիսների կենսաթոշակը ստանալու իրավունքն ընդհանրապես»:
Հռիփսիմե ՋԵԲԵՋՅԱՆ
