Կենտրոնական ընտրական հանձնաժողովն այսօր արտահերթ նիստում քննեց նախագահի թեկնածու Րաֆֆի Հովհաննիսյանի լիազոր ներկայացուցիչ Արմեն Մարտիրոսյանի՝ ՀՀ նախագահ Սերժ Սարգսյանի գրանցումն անվավեր ճանաչելու պահանջով դատարան դիմելու վերաբերյալ դիմումը:
ԿԸՀ նախագահը նախ ճշտեց նման լիազորություն ունի՞:
«Այսպիսի լիազորություն ունեմ, Հովհաննիսյանը տեղյակ է այս փաստաթղթի մասին: Վստահեցնում եմ, որպես լիազոր ներկայացուցիչ ինձ հանձնարարեց, որ փաստաթուղթը ստորագրեմ ու ներկայացնեմ»,- պատասխանեց պարոն Մարտիրոսյանը:
Պարոն Մուկուչյանն էլ ասաց, որ գրանցումն անվավեր ճանաչելու պահանջ կարող է ներկայացնել միայն թեկնածուն, եթե վերջինիս անունից ինչ-որ մեկը ստորագրում է, պետք է ունենա հատուկ լիազորություններ, իսկ պարոն Մարտիրոսյանի լիազորությունները բանավոր պայմանավորվածությամբ են: Չնայած սրան, հանձնաժողովը քննեց դիմումը:
Կարդացեք նաև
Ր. Հովհաննիսյանի ընտրական շտաբի անդամ Կարեն Մեժլումյանը ներկայացրեց տվյալներ, լուսանկարներ, որոնք փաստում են, որ Սերժ Սարգսյանն ունեցել է 1600 շտաբ, ապա ասաց, որ յուրաքանաչյուր նախընտրական շտաբ ունեցել է քարոզչական պաստառ, իսկ կատարված ամբողջ ծախսը ներառված չէ հայտարարագրերում:
Պարոն Մարտիրոսյանն էլ պնդեց, որ Սերժ Սարգսյանի քարոզչական ծախսերը 110 մլն դրամը գերազանցել են :
Տ. Մուկուչյանն էլ հետաքրքրվեց քարոզչական նյութերի հետ կապված, եթե քվեարկությունից 20 օր առաջ հնարավոր էր պարզել՝ ինչո՞ւ դա չեն արել այն ժամանակ: ինչո՞ւ այդ դիմումն ավելի շուտ չեն ներկայացրել:
«Կարծել ենք, որ նման փաստաթուղթ Սերժ Սարգսյանի ներկայացուցիչները կներկայացնեն»:
«Ապացույց ունե՞ք, ինչ հաշվարկ եք արել, որ ստացվել է 10 տոկոսից ավելի»,- հանձնաժողովի անդամներից մեկի հարցին, պարոն Մարտիրոսյանը պատասխանեց. «Շուկայական գները հաշվեք՝ նրանց ներկայացրած 1600 շտաբների չափով»:
Պարոն Մուկուչյանն էլ ասաց, որ ապացույցները կցված չեն փաստաթղթին. «Առաջարկում եմ կես ժամով ընդմիջել նիստը»:
Արփինե ՍԻՄՈՆՅԱՆ
