«Ակտիվ քաղաքական փուլում ենք: 2013թ.-ի ընտրությունները տարբերվում էին բոլոր ընտրություններից, քանի որ մրցակցային բնույթ չէին կրում»,-այսօր լրագրողների հետ հանդիպման ժամանակ հետընտրական զարգացումների մասին նշեց «Կովկաս» ինստիտուտի փոխտնօրեն Սերգեյ Մինասյանը:
Նրա պնդմամբ, ընտրությունները չճանաչած թեկնածուն այլ մարտավարություն է ծավալում: Րաֆֆի Հովհաննիսյանը 3-րդ սցենարի տարբերակն է ընտրել, այսինքն երկարաժամկետ քաղաքական պայքարի մեջ է մտնել.
«Ի տարբերություն նախորդ ընտրությունների, հիմա մենք նախընտրական փուլը շուտ ենք անցնում: Սա դժվար քաղաքական ճանապարհ է, որը ոչ մի քաղաքական գործչի չի հաջողվել անցնել, թերեւս ամենադժվար ճանապարհները երբեմն հանդիսանում են ամենաճիշտը»:
Բանախոսի համոզմամբ, եթե Րաֆֆի Հովհաննիսյանին հաջողվի քաղաքական պայքարի բնույթը շարունակել, ապա դա կլինի քաղաքական նոր իրականության ստեղծում: Նա չի դիմում ուժային հակասահմանադրական քայլերի, դա լավ պայքար է, որի ոճը եւ ձեւը մենք դեռ չենք ունեցել.
Կարդացեք նաև
«Նրա գործունեությունը անսպասելի էր հասարակության եւ քաղաքական գործիչների համար: Յուրաքանչյուր քաղաքականություն իշխանություն ձեռք բերելու համար է արվում: Նրա դեպքում նպատակը մարտավարական բնույթի շահույթ ստանալը չէ, այլ պարզապես փորձել ավելի լուրջ ու կայուն դեր խաղալ Հայաստանի ներքաղաքական կյանքում: Իր կողմնակիցների հետ նա ունի ահռելի ռեսուրս»:
Անժելա ՇԱՀՈՒՄՅԱՆ
