Աժ նախկին նախագահ Բաբկեն Արարքցյանը այսօր ՀՀՇ համագումարի ողջ ընթացքում ընդվզեց ու տարբեր հարցադրումներով փորձեց հասկանալ ՀԱԿ նոր կուսակցության իմաստը:
Նրա խոսքերով, տարօրինակ է, որ համագումարին ներկա 500 անդամները ՀԱԿ կուսակցության ստեղծման նախաձեռնությանը կողմ կքվեարկեն, իսկ ինքը, որ դեմ կամ ձեռնպահ կքվեարկի, մեխանիկորեն կդառնա նոր կուսակցության անդամ. «Ոչ, դա օրենքի խախտում է: Կուսակցությունը քաղաքացիների կամավոր միասնություն է: Անհատին, ուղղակի շարքով տանել մի կուսակցություն, ինձ համար ընդունելի չէ: Մեզ փորձում են ներկայացնել, որ 12.000 հոգի, ինչ-որ ակտիվիստներ ՀԱԿ կուսակցության են անդամագրվելու: Ինձ չի թվում, որ ՀՀՇ-ի անունը մի քիչ այսպիսին էր՝ չէին մտնում, բայց հիմա, որ ՀՀՇ-ն անունը փոխի, այդ 12.000-ը կգան, կմտնեն: Աստված տա, գան, մտնեն, ես շատ ուրախ կլինեմ: Մեզ ասում են՝ տեխնիկական հարց է, ուղղակի անունն ենք փոխում եւ վերջ: Կներեք, ես կարդում եմ որոշման նախագծի բ) կետը՝ կուակցության նոր ծրագրի եւ կանոնադրության մշակում: Այսինքն՝ ի՞նչ է ստացվում: Կքվեարկենք ու կդառնանք այլ կուսակցության անդամ, հետո կսկսենք նոր ծրագի՞ր քննարկել: Անուն փոխելը տեխնիկական գործ չէ, անունը ճակատագրական նշանակություն ունի, մի ներկայացրեք, որպես տեխնիկական հարց: Ամբիցիաներ ունեմ եւ շարժման հիմնադիրներից մեկն եմ»:
Պարոն Արարքցյանը վերջում էլ հավելեց. «Բոլորն ասում են Կոնգրեսը, ՀՀՇ-ն այս վիճակում են, արժի, որ ամեն մեկս մեր մեջ մտածենք՝ ի՞նչ եղավ, որ հայտնվեցինք այս վիճակում»:
Կարդացեք նաև
Հիշեցնենք, որ պարոն Արարքցյանը բաց քվեարկությամբ դեմ քվեարկեց նախաձեռնությանը:
Արփինե ՍԻՄՈՆՅԱՆ
