Այս տարի նորաձև են կապույտ, նարնջագույն, մոխրագույն և կանաչ գույները (վերջինը խամրած երանգներով): Այս կարծիքին են համաշխարհային ոճաբանները: 2013 թվականի հավաքածուների համար առաջարկում են մարմինն ընդգրկող կիպ հագուստներ՝ մեծամասամբ օձի թեփուկանման կտորների համադրմամբ՝ հաշվի առնելով տարվա խորհրդանիշը:
Նորաձև և գեղեցիկ հագուստը գրեթե յուրաքանչյուր կնոջ մտահոգության առարկան է: Շատերը նախընրում են այնպիսի հագուստներ, որոնք սազական են իրենց կամ մատչելի են իրենց գրպանին, իսկ ոմանք հետևում են միայն նորաձևության տենդենցներին: Այս տարի նորաձևության սիրահարներին դիզայներներն առաջարկում են հետաքրքիր լուծումներ. ավանդական շապիկները փոխարինել բամբակից, ատլասից պատրաստված վերնաշապիկներով: Շորիկների սիրահարներին դիզայներներն առաջարկում են վառ գույների, մուլտհերոսների պատկերներով հագուստներ, նաև պրինտներ: Նորաձև են նաև միատոն շորիկները:
21-ամյա Լիանան միշտ կրում է սև գույնի հագուստներ. «Դա ամենատարածված և պրակտիկ գույնն է: Ցույց չի տալիս մարմնի թերությունները, իսկ դու չես բարդույթավորվում»,-ասում է նա: Իսկ միջազգային ոճաբանները խորհուրդ են տալիս հրաժարվել միատոն սև գույնի հագուստներից, կարելի է դրանք համադրել օրինակ` մետաքսի հետ:
Գեղեցիկ հագուստը պետք է համադրել համապատասխան պայուսակով: Դիզայներներն խորհուրդ են տալիս դրապից, կաշվից պայուսակներ: Դրանց նորաձև երանգներ են համարվում սևը, շագանակագույնը, մանուշակագույնը և սևը:
Նազենի Բաղդասարյան
