«Առավոտ» օրաթերթի եւ aravot.am կայքի խմբագրությանը
Ի պատասխան «Առավոտ»’ օրաթերթում եւ aravot.am կայքում ս/ թ փետրվարի 23-ին տպագրված լուրի, որը վերաբերում էր «Օազիս» ռեստորանում Գյումրու նախկին քաղաքապետ Վարդան Ղուկասյանի իբր «քեֆ անելուն», հարկադրված ենք հերթական անգամ փաստելու, որ ստահոդ տեղեկություններ թխելն ու սփռելը ոմանց աշխատաոճի հիմնական մասն է կազմում:
Վարդան Ղուկասյանի կողմից որեւէ խնջույք կամ, ինչպես նշված է լուրի մեջ, «քեֆ» չի կազմակերպվել: Տպագրված տեղեկությունը լկտի սուտ է:
Տպավորություն է ստեղծվում, որ նյութի հեղինակը ցանկություն ունի, իր բառերով ասած, «ողբի կամ քեֆի» առիթների մասնակից դառնալ:
Ցավոք, 13 տարի շարունակ, «Առավոտի» էջերում մենք առնչվել եւ շարունակում ենք առնչվել Գյումրու նախկին քաղաքապետի անձին ու գործունեությանը վերաբերող վարկաբեկիչ ստերի տիրաժավորմանը:
Հերքման սույն տեքստը, օրենքով սահմանված կարգով, չտպագրելու դեպքում, կդիմենք դատարան` սուտ, կեղծ տեղեկություն տարածելու եւ անձի իրավունքները սահմանադրորեն պաշտպանելու համար:
Գյումրու նախկին քաղաքապետ Վ.Ղուկասյանի գրասենյակի մամուլի ծառայություն
Հ.Գ. – «Առավոտի» կողմից ավելացնենք, որ պարոն Ղուկասյանի գրասենյակը, սեփական փորձից, թերեւս, պիտի իմանար, որ հերքման ցանկացած տեքստ, եթե իհարկե, այն չի պարունակում անձնական վիրավորանքներ, «Առավոտը» միշտ էլ տպագրել է: Սակայն նրանք, ամեն դեպքում, մինչ հերքման տեքստը ուղարկելը «պրոֆիլակտիկայի համար» զանգահարել եւ սպառնացել են մեր լրագրողին:
Լսել եմ, որ Հայ Առաքելական Եկեղեցին ցանկանում է սրբացնել ազգի մեծագույն և արժանի
զավակներին: Հուսով եմ, որ նկատի կունենա նաև,՝ վարդան ղուկասյանին: Նրա անմեղ դեմքը, և
ազգանվեր գործերը աժանի են այդ պատվին, և հարիր այսօրվա մեր եկեղեցու վարքագծին: