ՀՀՇ արտահերթ համագումարը շարունակվում է եւ քիչ առաջ ԱԺ ՀԱԿ խմբակցության ղեկավար Լեւոն Զուրաբյանը ներկայացրեց, ՀՀՇ-ն ՀԱԿ կուսակցություն վերանվանելու նախաձեռնության անհրաժեշտությունը:
«ՀՀՇ-ի այլ կուսակցությունների հետ միասին ստեղծել ենք մի շարժում, որը սկզբից կուսակցությունների հավաքականություն էր ներկայանում, բայց շատ արագ հենց շնորհիվ այդ միավորման դարձավ համաժողովրդական շարժում, որին միավորվեցին բազմաթիվ անկուսակցականներ: 2008-ին ՀԱԿ դաշինքի գլխավոր նվաճումն այն էր, որ պայքարի մեջ կարողացանք ներգրավել բազմաթիվ մարդկանց: Ժամանակն է արձանագրելու, որ այդ բոլոր մարդիկ դարձել են այս շարժման լիիրավ անդամներ, բայց, ցավոք, չունեն ոչ մի մեխանիզմ ազդել քաղաքական որոշումների վրա: Դա հիասթափություն է առաջացրել, վանում է մարդկանց: Այսօր մենք նախաձեռնում ենք մի գործընթաց, որը թույլ կտա այս բոլոր մարդկանց, միավորվել: Ազատ մարդկանց մի հավաքականություն է ստեղծվում միասնական կուսակցության մեջ, որի շնորհիվ արդյունավետ, ավելի վճռական պայքար կտանենք այս ավազակապետության դեմ: Արդյոք սա ամենաազնիվ նպատակներից մեկը չէ՞, որ կարող ենք միասին իրագործել: Արհեստական գործ չենք անում, սա վաղուց դարձել է մեր կյանքի ձեւ, տեսաձեւ, սա դարձել է պայքարի ձեւ»,- ասաց պարոն Զուրաբյանը:
Նրա խոսքերով, անկուսակցական մարդկանց ներգրավվելու, կոնգրեսի ներսում որոշումների ընդունման մեխանիզմը փոխելու կարիք կա. «Կոնգրեսը հայտնվել է պարալիզացված վիճակում, այդ վիճակը ավելի է խորանում, որովհետեւ գտնվում ենք շարժման անցման շրջանում, մի պահի, երբ երկրում սրընթաց զարգացումներ են ընթանում: Շատ ժամանակ չունենք, պետք է շատ արագ դառնանք վճռական ու մարտունակ քաղաքական ուժ: Պետք չէ այլ բաներ փնտրել: Եթե կարող ենք ստեղծել մի գործիք, որը կլինի ավելի հզոր, ինչու դա չանե՞նք: Ապացուցենք, որ պատրաստ ենք բոլոր քաղաքական, կուսակցական ամբիցիաները մի կողմ դնել՝ հանուն այս սուրբ գործի: Կոչ եմ անում հաշվի առնել այս հանգամանքները եւ գնալ դեպի հաղթանակ միասին»
Արփինե ՍԻՄՈՆՅԱՆ
