«Բարեւ» արշավը՝ Աշտարակում
«Այս հաղթանակը պատկանում է ժողովրդին, ոչ թե ինձ: Հայաստանի շարքային քաղաքացուն: Վերջնախաղ ոչ ոք չի տալու: Վերջնախաղը դուք եք տալու»,- այսօր Աշտարակում «բարեւ» արշավի ժամանակ հայտարարեց Րաֆֆի Հովհաննիսյանը:
Նրա խոսքերով՝ «Եթե որեւէ մեկը հանդգնի հայ ժողովրդին, Հայաստանի քաղաքացուն, ոստիկանի, զինվորի դեմ ձեռք բարձրացնի, պատասխան է տալու: Պետական ծառայողները մեր հպարտությունն են, եթե պետական իրենց գործառույթի մեջ են եւ գտնվում են պետական հրամանի տակ: Բայց ոչ երբեք հայ ժողովրդի դեմ ձեռք բարձրացնեն: Սրանից հետո պիտի ունենանք ազատ, արդար հանրապետություն, որը չի ենթարկվում որեւէ կուսակցության, միմիայն Սահմանադրության»:
Րաֆֆի Հովհաննիսանը անդրադարձավ նաեւ քաղաքապետարանի օրինախախտմանը: Այնտեղ «չգիտեմ ինչ կուսակցության» գրասենյակը կա, պետք է հանել այդ կուսակցությունը՝ այսօր ՀՀԿ , վաղը «Ժառանգություն» կլինի, չպե՛տք է պետական շենքում լինի. «Մեծ լիցք կա այդ հրապարակում, որ ժամանակին դատարկ էր, հիմա լեփ-լեցուն: Մենք զգում ենք, որ սա ոչ թե մի թեկնածուի հաղթանակն էր: Հայ ժողովուրդն ասում է, որ սա իմ բարեւն է եւ իմ Հայաստանի Հանրապետությունը: Այս պայքարը պիտի տանենք խաղաղ, սահմանադրական, հետեւողական: Ոչ մեկը ձեզ թող չհամոզի, որ հետ ենք կանգնելու: Ժողովուրդը ինքը ասաց, որ վախկոտ չէ, որ ինքը տեր է մեր Սահմանադրության: Ես ակնկալում եմ, որ պետական շենքերը կվերադարձվեն ժողովրդին: Ոստիկանները, որ նկարում են մեզ, դա անում են իրենց պետական պարտականության մեջ, բայց ոչ երբեք ժողովրդին վախեցնելու համար, որովհետեւ եթե որեւէ մեկը ժողովրդին վախեցրեց, մինչեւ վերջ պատասխան է տալու»
Կարդացեք նաև
Րաֆֆի Հովհաննիսյանը աշտարակցիներին բացատրեց, որ ինքը եկել է ուղղակի մի հատ բարեւ ասելու, որովհետեւ ինքը աշտարակցիներին չի մոռացել. «Դուք եք եկել, դուք եք քվե տվել: Որքան շուտ պարոն նախագահ Սարգսյանը հանգուցալուծում տա այս ակնհայտ տագնապին, որովհետեւ ժողովուրդը որոշել է, այդքան լավ: Ես ասում եմ, որ ոչ միայն ճանապարհն է կարեւոր, այլ նաեւ կանգառը: Այս կանգառը որոշեց, որ ինքը հաղթել է»:
Վերջում պարոն Հովհաննիսյանը խոստացավ միշտ գալ ու պատասխանել ժողովրդի հարցերին:
Պարոն Հովհաննիսյանը նաեւ ակնարկեց, թե ինքն ինչ ակնկալիքներ ունի Սերժ Սարգսյանից. «Եթե պարոն Սարգսյանը անի իր առաջարկը, ես կտեսնեմ, որովհետեւ ես իմ առաջարկը տվել եմ: Կյանք է, սխալվում են, մարդը սխալական է: Ես կկանգնեմ 5 տարի հետո նոր նախագահի կողքին, 5 տարի հետո ես չկամ, իսկ այս հինգ տարիներին ես Հայաստանը պիտի դուրս բերեմ արտագաղթից: Պիտի դուրս բերենք Աշտարակը վախից եւ անարդարությունից: Պիտի տեսնեք, որ մեր քաղաքի տները պիտի լուսավորվեն վերադարձով: Կամաց-կամաց այս կողպեքները պիտի բացվեն»:
Հռիփսիմե ՋԵԲԵՋՅԱՆ
Կեցցեք Դուք,՝ իմ լավ ժողովուրդ, իմ հայ ժողովուրդ: Կեցցե,՝ Ռաֆֆին, որ նոր զարթոնք ու հույս
արթնացրեց մեր սրտերում: Այս անգամ հաղթանակը անխուսափելի է, բազում խելացի գործերի և
մտքերի իրականացումը՝ նույնպես: Աստված բարին կատարի, չարը հեռանա, կորչի առանց արյուն
թափելու: Հայը աշխարհին ցույց տա իր շնորքն ու տաղանդը,՝ առանց խաշի, խորովածի, քյաբաբի
ու տրնգիի: