«Ես արցախյան պատերազմին մասնակցած մարդ եմ: Պատերազմի տարիներին, երբ ես պատերազմի դաշտում էի, իմ բնակարանն ինձանից խլել են: Ես դրանցից չեմ վախենում. դրանք թալանչիներ են»,-ասաց Երեմ Ղուկասյանը, որն այսօր եկել էր Ազատության հրապարակ՝ իր բողոքը հայտնելու, հավելելով, որ ցանկություն ունի ամբիոնից խոսելու, սակայն իրեն չեն թողնում. «Դիմել եմ վարչապետին, քաղաքապետարան, դատախազություն, ամեն տեղ, բայց անօգուտ, ոչ մեկ ուշադրություն չի դարձնում. փողոցում եմ գտնվում»:
Երեմ Ղուկասյանն այսօրվա հավաքը իր վերջին հույսն է համարում և, եթե Րաֆֆին էլ չկարողանա ինչ-որ բան փոխել, ապա որոշել է՝ լքելու է Հայաստանը և արտերկրում բարձրաձայնելու ՀՀ-ում տեղի ունեցող ներքաղաքական վիճակի մասին: «Ես չեմ ուզում գնալ, սա իմ երկիրն է, ինձ հարազատ է, բայց ինչ անեմ: Ինչ անեմ, որ ավազակների ձեռ ենք ընկել»,-բողոքեց նա:
Ցուցարարի խոսքով` իրեն առաջարկել են մնալ ծերանոցում. «Վիրավորականն այնն է, որ ինձ ծերանոց են առաջարկում: Ես կռված մարդ, շրջապատ ունեցող մարդ, ինձ ծերանոցում մի սենյակ են տալիս, ասում ապրի»:
Կարդացեք նաև
Քրիստինա ՄԻՐԶՈՅԱՆ
