Մրցույթը տեղի կունենա հունիսի 14-ին` Լեհաստանի Գդանսկ քաղաքում
Այսօր Հանրային հեռուստընկերության մամուլի սրահում տեղի ունեցավ հանդիպում` նվիրված հունիսի 14-ին Լեհաստանի Գդանսկ քաղաքում տեղի ունենալիք «Պատանի պարողների Եվրատեսիլ 2013»-ին:
Օպերայի և բալետի ազգային ակադեմիական թատրոնի մենապարող, ժյուրիի անդամ Ռուբեն Մուրադյանը հայտնեց, որ Հայաստանի մասնակիցներից եզրափակիչ փուլ է անցել 11-ը, որից 3-ը` տղա. «Բոլորը մեծ պատասխանատվությամբ են հանդես գալիս, քանի որ Հայաստանն են առաջին անգամ ներկայացնում պարի միջոցով: Մասնակիցները շատ լավն են` մեկը մյուսից հետաքրքիր: Լավագույն պարողի անունը հայտնի կլինի վաղը»:
Կարդացեք նաև
Մուրադյանը հավելեց, որ մրցույթին մասնակցության համար պարտադիր է դասական պարի իմացությունը. «Հնարավոր է, որ Հայաստանի մասնակցի պարում ներառվեն ազգային պարի եւ երաժշտության էլեմենտներ, բայց մրցույթը միջազգային ստանդարտի է»:
«Եվրատեսիլ» նախագծի պատասխանատու Գոհար Գասպարյանն ասաց, որ վաղվա մրցության արդյունքում հաղթած պարը չէ, որ «մեկնելու» է Լեհաստան. «Պարզապես կընտրվի լավագույն մասնակիցը, այնուհետեւ կբեմադրվի հատուկ պար, կմշակվի երաժշտություն: Հաղթողը կընտրվի ժյուրիի քվեարկության արդյունքում, քանի որ մրցույթն իսկապես մասնագիտական է: Գնահատվում է ոչ թե պարը, այլ տարիների ընթացքում պարողի կատարած աշխատանքը, նրա անցած դպրոցը, որը ակնհայտ է դառնում 1,5 րոպե տվողությամբ պարի միջոցով»:
«Մանկական Եվրատեսիլի», «Պատանի պարողների Եվրատեսիլի» և «Պատանի երաժիշտների Եվրատեսիլի» ղեկավար Վլադիսլավ Յակովլևը հույս հայտնեց, որ եզրափակիչ փուլը կանցնի արժանի մակարդակի վրա: Յակովլևն ասաց, որ դիտել է կիսաեզրափակիչը, սակայն չեզոք դիրքորոշում ունի եւ առայժմ չի հայտնի իր ֆավորիտ-մասնակցի անունը:
Յակովլեւը նշեց, որ եզրափակչին, Հայաստանից բացի, մասնակցում են Բելառուսը, Ուկրաինան, Նորվեգիան, Շվեդիան, Գերմանիան, Լեհաստանը, Չեխիան, Սլովենիան:
Լուիզա ՍՈՒՔԻԱՍՅԱՆ
