«Ես չեմ կարծում, որ անհավասարաչափ լուսաբանում է: Չեմ կարծում, որ իմ հեռուստացույցը կամ մեր տան ռադիոընդունիչը տարբերվում են այլ քաղաքացիների կամ «Ժառանգության» անդամների սարքերից: Ես եւ տանն՝ աշխատանքից հետո, նայում եւ տեսնում եմ, թե ի՞նչ չափով է լուսաբանվում: Եվ հանրահավաքներն են լուսաբանվում, եւ նրանց հայտարարություններն են լուսաբանվում, եւ ասուլիսները»,- Aravot.an-ի հետ զրույցում հակադարձելով «Ժառանգություն» կուսակցության տարբեր ներկայացուցիչների այն հայտարարություններին, որ հետընտրական ժամանակաշրջանում, հեռուստառադիոլուսաբանումների մոնիթորինգի ավարտից հետո, կրկին անհավասարաչափ լուսաբանում է ընթանում, ասաց ՀՌԱՀ նախագահ Գրիգոր Ամալյանը:
Ըստ մեր զրուցակցի, օրենսդրությունը հստակ կարգավորում եւ պահանջներ է առաջադրում նախընտրական քարոզչության վրա, ներառյալ քվեարկության օրը: Դրանից հետո, հավասար պայմանների հատուկ կարգավորում օրենսդրությամբ սահմանված չէ. «Թեկնածուն թեկնածու է, գրանցման օրից մինչեւ քվեարկության օրը: Այսօր դժվար թե մենք շարունակենք հաջորդ հինգ տարիների համար գրանցվելիք թեկնածուների հավասար պայմանների ապահովումը: Մեր երկրում արդեն հեռուստաընկերություններն իրենք են որոշում հանրային հետաքրքրություն ներկայացնող քաղաքական իրադարձությունները եւ դրանց լուսաբանումը»: Ըստ Գրիգոր Ամալյանի, կոնկրետ «Ժառանգության» այսօրվա քաղաքական ակտիվությունը բավարար, լավ լուսաբանվում է:
Նելլի ԳՐԻԳՈՐՅԱՆ
