Նուլանդ. «Լեռնային Ղարաբաղի հակամարտությունը չի կարող լուծվել ռազմական ճանապարհով»
ԱՄՆ-ի արտգործնախարարության խոսնակ Վիկտորիա Նուլանդը արտգործնախարարությունում անցկացված մամուլի ասուլիսի ընթացքում անդրադարձել է Խոջալուի ողբերգությանը և Հայաստանում անցկացված ընտրությունների վերաբերյալ հարցերին:
Մամուլի ասուլիսին ներկա «ԱՆՍ» ադրբեջանական հեռուստաընկերության լրագրողն ԱՄՆ-ի արտգործնախարարության խոսնակին հարցրել է, թե Խոջալուի ողբերգության հերթական տարելիցը մոտենալուն պես արդյոք կան Խոջալուի ողբերգության զոհերի հիշատակը հարգելու որևէ ծրագրեր:
Նույն լրագրողը իր նախորդ հարցի հետ մեկտեղ հետաքրքրվել է, թե արդյոք որևէ արձագանք կլինի ԱՄՆ-ի Սպիտակ տան ինտերնետային էջում անցկացված ստորագրահավաքին, որի մասնակիցները պահանջել են հարգել Խոջալուի ողբերգության զոհերի հիշատակը և որպես ցեղասպանություն ճանաչել այդ ողբերգությունը:
Կարդացեք նաև
Պատասխանելով լրագրողի հարցերին՝ ԱՄՆ-ի արտգործնախարարության խոսնակ Վիկտորի Նուլանդը վերահասցեավորել է երկրորդ հարցը՝ նշելով, որ այն պետք է տրվի ԱՄՆ-ի Սպիտակ տանը:
Անդրադառնալով Խոջալուի ողբերգությանը վերաբերող հարցին՝ Նուլանդն ասել է, որ Հայաստանի և Ադրբեջանի միջև պատերազմում կյանքի ողբալի կորուստը հիշեցնում է բոլորին, որ Լեռնային Ղարաբաղի հակամարտությունը չի կարող լուծվել ռազմական ճանապարհով:
«Տարածաշրջանում կայունություն, բարեկեցություն և հաշտեցում կարող է հաստատվել միմիայն հարատև և խաղաղ կարգավորման միջոցով: Որպես Մինսկի խմբի համանախագահ, հավատարիմ ենք մնում այդ ուղղությամբ կողմերի հետ աշխատելուն»,- նշել է Վիկտորիա Նուլանդը:
Անդրադառնալով այն հարցին, թե արդյոք որևէ նոր տեղեկություններ կան Հայաստանում անցկացված նախագահական ընտրությունների ընթացքում տեղ գտած խախտումների հետաքննության առումով՝ ԱՄՆ-ի արտգործնախարարը հիշեցրել է, որ այս շաբաթվա սկզբին անդրադարձել էր Հայաստանում ստեղծված իրավիճակին՝ ինչպես դրական, այնպես էլ դեռևս կարգավորման անհրաժեշտություն ունեցող զարգացումներին:
«Ընդհանրապես, մենք, ԵԱՀԿ/ԺՀՄԻԳ-ի հայտարարությանը համապատասխան, գովասանքի խոսքեր ենք ուղղել Հայաստանի ժողովրդին վարչական տեսակետից ընդհանուր առմամբ լավ անցկացված ընտրությունների կապակցությամբ: Սակայն, ինչպես և բազմաթիվ այլ երկրներում, կան հարցեր, որոնց անհրաժեշտ է անդրադառնալ՝ առաջընթաց գրանցելու համար: Ես սակայն որևէ նոր տեղեկություններ չունեմ մեր կողմից նախօրեին հրապարակված ծավալուն հայտարարության շուրջ», – եզրափակել է ԱՄՆ-ի արտգործնախարարության խոսնակ Վիկտորիա Նուլանդը:
Արմեն Հովհաննիսյան
«Ամերիկայի Ձայն»
