Մաքսավորները անվադողերը չե՞ն համարակալում
Aravot.am-ի հարցին, թե մաքսավորների կողմից անվադողերը համարակալելը եւ ավտոմեքենայի գործող անիվների համար մաքս պահանջելն արդյոք օրենքի շրջանակներո՞ւմ է, երեկ ՊԵԿ տեղեկատվության եւ հասարակայնության հետ կապերի բաժնից պատասխանել են. «Ի պատասխան Ձեր հարցման, հայտնում ենք, որ այդ տեղեկատվությունը չի համապատասխանում եւ չէր էլ կարող համապատասխանել իրականությանը, քանի որ մաքսային նման ընթացակարգի մասին խոսելն անգամ անհեթեթություն է»:
Aravot.am-ն իր` «Մաքսավորները անիվները համարակալում են, որ վարորդները «գլխներից չթռնեն», առանց մաքս անիվ ներմուծեն» հրապարակմամբ , մասնավորապես, անդրադարձել էր, որ հայ-վրացական սահմանակետում աշխատող մաքսավորները սկսել են Վրաստան գնացող հայկական ավտոմեքենաների անիվները համարակալել, քանի որ գլխի են ընկել, որ հայ շատ վարորդներ «քաչալ» անիվներով գնում են Վրաստան ու միանգամայն նոր անիվներով վերադառնում` այդկերպ խուսափելով մաքս վճարելուց:
Aravot.am-ի հետ զրույցում վարորդները պատմել էին, որ հայ վարորդները նախընտրում են անվադողերը Վրաստանից բերել, քանի որ, ինչպես իրենք են վստահեցնում, Վրաստանում անվադողերը անհամեմատ էժան են:
Կարդացեք նաև
Լուսինե ԲՈՒԴԱՂՅԱՆ
