Վարդգես Գասպարին այս պահին պառկած է Բաղրամյան 26-ի մուտքի մոտ: Aravot.am-ը խնդրեց մի փոքր հարցազրույց տալ եւ ասել, թե այս անգամ ինչն է պառկելու նպատակը: «Ես ուղղակի ուզում եմ անցնել մայթը, ոստիկանները խոչընդոտում են իմ այդ տարրական իրավունքը: Էլ ի՞նչ իրավունքների պաշտպանման մասին է խոսքը»:
Մենք նաեւ ոստիկանության փոխգնդապետից հետաքրքրվեցինք, թե իր սիրտը չի՞ ցավում ՀՀ քաղաքացու առողջության համար: «Ցավում է»,- պատասխանեց փոխգնդապետը՝ ասելով, որ ինքը ծառայություն է իրականացնում, որի շրջանակներում իրավունք ունի որոշ չափով սահմանափակել քաղաքացիների իրավունքները:
Վարդգես Գասպարին հորդորեց այդ տեսանկյունից չնայել խնդրին. «Խնդիրն իմ առողջությունը չէ եւ բարոյական կողմը չէ, պետք է հարցնել, թե ի՞նչ հիմքով են խոչընդոտում իմ՝ մայթով անցնելու իրավունքը, երբ ես որեւէ օրենք չեմ խախտում: Իրենք պարզապես իմ մեջ վտանգ են տեսնում»:
Կարդացեք նաև
Մի անցորդ բժիշկ մոտեցավ Գասպարիին եւ խնդրեց, որ վեր կենա. «Կմրսես, կսառես, ախր պառկելով ի՞նչ հարց պիտի լուծես, վե՛ր կաց»: Գասպարին չհամաձայնեց. «Էն 500 հազար քաղաքացիները, որոնք ապրում են ծայրահեղ աղքատության մեջ, ինչո՞ւ ձեզ չեն հուզում»:
Մենք բժշկից հետաքրքրվեցինք, թե այսպես այս սառը ասֆալտին պառկելով ի՞նչ հիվանդություն կարող է ստանալ քաղաքացին: Բժիշկը պատասխանեց՝ թոքաբորբը կա ու կա:
Գասպարին նաեւ ասաց, որ իր քաղաքական հայացքները չեն փոխվել եւ ինքը Րաֆֆի Հովհաննիսյանին ձայն չի տվել, բայց փաստ է, որ կեղծվել են ընտրությունները:
Հռիփսիմե ՋԵԲԵՋՅԱՆ
