«Ընտրությունների արդյունքները կարող է չբավարարել ընդդիմությանը, և սա բնական է, սակայն քայլերը պետք է կատարվեն իրավական առումով: Եթե օրենքը բոլորի համար հավասար է, ապա թող գնան այդ ճանապարհով»,- այսօր այս մասին «Հայացք» մամուլի ակումբում ասաց ԱԺ պատգամավոր, Քրիստոնեա-դեմոկրատական կուսակցության նախագահ Խոսրով Հարությունյան:
Նա այս ընտրություններում էական է համարում նախընտրական շրջանը, որտեղ բոլոր թեկնածուները հնարավորություն են ունեցել հավասարաչափ օգտվելու հեռուստաեթերից և հավասարաչափ հանրությանը փոխանցել իրենց ծրագրերի ու գաղափարների մասին, որը վճռորոշ կդառնար քվեարկության օրը: Բանախոսը չի հերքում, որ քվեարկության օրը եղել են ընտրախախտումներ, սակայն, այնուամենայնիվ, այս ընտրությունները համարում է օրինաչափ:
«Ընտրությունները մրցակցային էին և հնարավորություն է տրվել մարդկանց անկաշկանդ մասնակցել ընտրություններին»,-ասաց Հարությունյանը:
Ինչ վերաբերում է Րաֆֆի Հովհաննիսյանի հանրահավաքին, նա հույս է հայտնում, որ այս ամենն ընդամենը էմոցիաներ են, և Րաֆֆի Հովհաննիսյանը հաշվի առնելով ոչ վաղ անցյալի տխուր փորձը, գերապատվությունը կտա ողջամտությանը և կգնա բանակցային ճանապարհով, այդ կերպ հանրությանը տանել ոչ թե փակուղի, այլ ստեղծել հենք՝ հնարավորինս կառուցողական զարգացումների համար:
Կարդացեք նաև
«Րաֆֆին իր քվեների մի մասի համար պետք է շնորհակալ լինի կառավարությանը: Իշխանությունը շահագրգռված է ունենալ ընդդիմադիր ուժ, որը կշնչի իր թիկունքում»,-ասաց Հարությունյանը:
Ըստ Հարությունյանի՝ կառավարության սխալ աշխատաոճի արդյունքում Րաֆֆին ունեցավ մեծաթիվ ընտրողներ «Ես կարծում եմ, որ Րաֆֆին ինքն էլ էր անակնկալի եկել՝ ունենալով ընտրողների մեծաթիվ զանգված: Հիմնականում այս քաղաքական դաշտում գնդակը Րաֆֆի Հովհաննիսյանի դաշտում է: Նա իր քաղաքական կենսագրության մեջ լուրջ քննություն է բռնել»,-ասաց Հարությունյանը:
Նա կարծում է, որ Րաֆֆի Հովհաննիսյանի համակիրները ակտիվորեն կմասնակցեն առաջիկա քաղաքապետի ընտրություններին:
Քրիստինա ՄԻՐԶՈՅԱՆ
