Լավագույն 3 աշխատանքների հեղինակները հունիսին Լոնդոնում կմասնակցեն եզրափակչին
Այսօր KASPERSKY LABORATORY հայտնի ընկերության ամենամյա IT Security for the next Generation խորագրով ուսանողական միջազգային գիտաժողովի «Ռուսաստան և ԱՊՀ երկրներ» փուլը այս տարի առաջին անգամ մեկնարկեց Հայաստանի պետական ճարտարագիտական համալսարանում (Պոլիտեխնիկ):
Գիտաժողովի նախընտրական փուլը հաղթահարած 14 զեկուցողից 10-ը Հայաստանից է (որից 7-ը` Պոլիտեխնիկից):
Բուհի ռեկտոր Արա Ավետիսյանը նշեց, որ «Ռուսաստան և ԱՊՀ երկրներ» փուլի` Պոլիտեխնիկում անցկացվելու փաստը արժանիքն է մասնագետների եւ երիտասարդ հետազոտողների. «Հուսով եմ, որ այս փուլը միայն տեղական մրցություն չի լինի, եւ մեր երիտասարդ հետազոտողները հետագայում էլ կքննարկեն բազնակողմանի, հետաքրքիր խնդիրներ, եւ , ինչու չէ, կաշխատեն համատեղ ծրագրերի շուրջ»:
Կարդացեք նաև
ՀՀ ԳԱԱ փոխնախագահ Յուրի Շուքուրյանի խոսքով. «Գիտաժողովի անցկացումը Հայաստանի համար կարեւոր իրադարձություն է, քանի որ ուղղված է մասնագետների, գիտաշխատողների եւ ուսանողների համախմբմանը: Վերջիններս հնարավորություն են ստանում ներկայացնել իրենց հաջողությունները եւ առաջ շարժվել: Ապագա սերնդի համար կիբերանվտանգության ապահովումը պարտավորեցնող խնդիր է եւ խոսում է այն մասին, որ ինֆորմացիոն տեխնոլոգիաները կրող սերունդները ընդլայնում են իրենց գործունեության շրջանակները, բայց միեւնույն ժամանակ` առաջադրում անվտանգության հետ կապված նոր խնդիրներ»:
Պարոն Շուքուրյանի դիտարկմամբ. «Մարդն այսօր իրականության եւ համակարգիչների միջեւ հայտնված փոքրիկ տարր է: Նախկինում ինֆորմացիոն անվտանգության խնդիրները կապված էին կոնկրետ սարքավորումների եւ ծրագրային ապահովման հետ, իսկ այսօր մարդն այդ գործում ակտիվ դեր ունի, մանավանդ, երբ ինֆորմացիոն անվտանգության ապահովումն առավել դժվար է»:
Գիտաժողովի լավագույն 3 աշխատանքների հեղինակները հունիսին Լոնդոնում կմասնակցեն եզրափակչին:
Լուիզա ՍՈՒՔԻԱՍՅԱՆ
