Ռուսական «Նեզավիսիմայա գազետա» օրաթերթը երեկ ուշագրավ հոդված է հրապարակել Հայաստանում կայացած նախագահական ընտրությունների վերաբերյալ։ «Սերժ Սարգսյանը մնաց նախագահ» վերնագրով հոդվածում, նշվում է. «Ինչպես եւ սպասվում էր, հենց առաջին փուլում հաղթանակ է տարել գործող նախագահ Սերժ Սարգսյանը՝ հավաքելով 60 տոկոսից մի փոքր պակաս ձայն։ Սակայն, անսպասելի էր նախկին արտգործնախարար, «Ժառանգություն» կուսակցության առաջնորդ Րաֆֆի Հովհաննիսյանի բարձր արդյունքը՝ ավելի քան 36 տոկոս։ Դա նշանակում է, որ Հայաստանում նոր ընդդիմադիր ուժ է ի հայտ եկել, իսկ նրա առաջնորդը, հնարավոր է, որ ի զորու է լուրջ մարտահրավեր նետել իշխանություններին»,- նշում է հոդվածագիրը, ապա շարունակում,- «Րաֆֆի Հովհաննիսյանի երկրորդ տեղը կանխատեսելի էր, սակայն նման ապշեցուցիչ բարձր արդյունք չէր սպասվում։ Նախորդ նախագահական ընտրություններում, երբ նախընտրական քարոզարշավը շատ ավելի թեժ էր, իսկ իրավիճակը՝ անկանխատեսելի, երկրորդ տեղը զբաղեցրած Լեւոն Տեր-Պետրոսյանը, ԿԸՀ-ի տվյալներով, 25 տոկոսից քիչ ձայն հավաքեց»։
Հոդվածագրի կարծիքով Րաֆֆի Հովհաննիսյանի հաջողությունը բացատրվում է 3 գործոններով վառ, մարդկային եւ մոբիլ քարոզարշավ, Գյումրիի ֆենոմենը, եւ ժամանակակից տեխնոլոգիաների կիրառումը։
«Հայկական ժամանակ»
