ԱԺ նախկին պատգամավոր Հակոբ Հակոբյանի եղբորորդու՝ Ստեփան Հակոբյանի դեմ հարուցված քրեական գործով Մալաթիա-Սեբաստիա վարչական շրջանների ընդհանուր իրավասության դատարանում այսօր հետազոտվեցին գործում առկա ապացույցները:
2006թ.հունիսի 22-ին սպանվել էր Մալաթիա համայնքի նախկին ղեկավար, հանգուցյալ Վահան Զատիկյանի որդին՝ Սեդրակը:
Ս.Հակոբյանը մեղադրվում է որպես սպանության պատվիրատու:
Հետազոտվեց Ստեփան Զատիկյանի տանը կատարված խուզարկության արձանագրությունը: Հայտնաբերվել էին փամփուշտներ,«Վինչեստր» հրացան, դաշույն, դանակ:
Կարդացեք նաև
Ստեփան Հակոբյանի պաշտպան Երեմ Սարգսյանը հայտարարեց, որ առգրավված փամփուշտները գործում չկան, չնայած որ նշված էին: Մեղադրական եզրակացության մեջ հղում էր արվել նաեւ փորձագետի եզրակացությանը, համաձայն որի, փամփուշտները պիտանի են եղել կրակելու համար, եղել են գործարանային արտադրության: Սակայն, ըստ պաշտպանի հայտարարության, գործի նյութերից բացակայում էր այս եզրակացությունը եւս, ինչի պատճառով իրենք զրկված են եղել դրան ծանոթանալու, իրենց մարտավարությունը կառուցելու իրավունքից:
Ռուզան ՄԻՆԱՍՅԱՆ
