«Այս տարի թանգարաններ այցելողների մոտ նկատում եմ անտարբերություն, պասիվություն: Հիմնական այցելուները դպրոցականներն են, թանգարան այցելելը, գրողներին, արվեստագետներին ճանաչելը, մեծ առաքելություն է: Տոմսի փոխարեն գիրք նվիրելով, մենք եւս մեկ անգամ ապացուցում ենք, որ գիրքը մեր կյանքում մեծ նշանակություն ունի»,-այսօր Aravot.am-ի հետ զրույցում նշեց Ավետիք Իսահակյանի անվան տուն-թանգարանի տնօրեն Հասմիկ Միքայելյանը:
Հայ մեծ գրող Հովհաննես Թումանյանի ծննդյան եւ գիրք նվիրելու համաշխարհային օրվա առթիվ մեկնարկել է «Գրքի բանկ» ծրագիրը: Նախաձեռնության շրջանակում փետրվարի 19-23-ը բոլոր ցանկացողները կարող են անվճար այցելել Երեւանի 20 թանգարաններ` մուտքի տոմսի փոխարեն նվիրելով գեղարվեստական կամ գիտահանրամատչելի գրքեր: Ծրագրի նպատակն է ամրապնդել գիրք նվիրելու եւ կարդալու մշակույթը Հայաստանում, հասարակությանը մասնակից դարձնել համայնքային զարգացմանը, ինչպես նաեւ աջակցել համայնքային գրադարաններին:
«Գրքի բանկ» -ին նվիրված բոլոր գրքերը փոխանցվելու են Շիրակ, Լոռի, Տավուշ, Վայոց Ձոր եւ Սյունիք մարզերի համայնքային գրադարաններին:
ՀՀ մշակույթի նախարարի խորհրդական Ներսես Տեր-Վարդանյանի խոսքով, միջոցառումը նպաստում է ընթերցանության խթանմանը եւ մշակութային հաստատություններ այցելելուն.
«Շատ ընթերցողներ ստանում են իրենց հետաքրքրող արժեքավոր գրքերը, նրանք նաեւ նվիրում են իրենց շատ սիրելի գրքերը մյուս ընթերցողներին: Սա լավ նախադեպ է ստեղծել, նույն ձեւաչափով բազմաթիվ կառույցներ այս ակցիայից օգտվում են: Եթե նախաձեռնությունը առողջ է, ապա դառնում է վարակիչ մյուսների համար»:
Անժելա ՇԱՀՈՒՄՅԱՆ
