Մեր երկրի շտապ բուժօգնությունը զարգացնելու եւ սուր հիվանդություններից ու վնասվածքներից մահացության դեպքերը նվազեցնելու համար ՀՀ առողջապահության նախարարության եւ ԱՄՆ միջազգային զարգացման գործակալության (ԱՄՆ ՄԶԳ) միջեւ անցյալ տարի կնքվել է համաձայնագիր, որով իրականացվելու է «Աջակցություն շտապ բուժօգնության ծառայություններին» դրամաշնորհային ծրագիրը:
Վաղը ՀՀ կառավարության նիստում առողջապահության նախարար Դերենիկ Դումանյանը կառավարությանն է ներկայացնելու ծրագրի այս տարվա նախահաշիվը հաստատելու մասին որոշման նախագիծը: Այս մասին տեղեկանում ենք կառավարության կայքէջից:
Ծրագրի հովանավորներն առաջարկել են բարելավել շտապօգնության դիսպետչերական համակարգը` կատարելագործելով ինչպես հեռախոսային ծածկույթը, այնպես էլ կենտրոնական դիսպետչերական ծառայությունները, վերապատրասել շտապ բուժօգնության ծառայությունների անձնակազմը, զարգացնել մանկական շտապ բուժօգնության եւ ծայրահեղ ծանր հիվանդների խնամքը մարզերում, կատարելագործել նախահիվանդանոցային բուժօգնության տրամադրումը` բարելավելով շտապ բուժօգնության առանձին կայաններն ու դրանց անձնակազմը եւ այլն:
Այս նպատակով 2013 թվականի պետական բյուջեում նախատեսվում է ավելացում եկամտային մասում` 149,386.7 եւ ծախսային մասում` 154,745.6 հազարական դրամի չափով:
Կարդացեք նաև
Լուսինե ԲՈՒԴԱՂՅԱՆ
