Այսօր «Հայելի» ակումբում ԱԺՄ կուսակցության նախագահ Վազգեն Մանուկյանն ասաց, որ 95-96 թվականներից Հայաստանը մտավ սխալ ցիկլի մեջ ու պարզ էր, որ Սերժ Սարգսյանն է հաղթելու: Մանուկյանը համոզված է, որ հաջորդ ընտրություններում մարդիկ արդեն կկարողանան ձայն տալ նրան, ում ցանկանում են. «Հիմա շատ բարդ պրոցես է հասունացել, այնպես ինչպես, որ տանձն է հասունանում ու ընկնում: Այսօր մենք կարող էինք լավ արդյունքներ ունենալ, բայց… Երբ մետաղը հալացնում են՝ կարող են անել այն, ինչ ուզում են, իսկ, երբ այն սառչում է` դժվար է մուրճով ինչ որ բան ծեծել դարձնել: Իսկ մենք կարող էինք լինել լավ պետություն: 96 թվին պրակտիկորեն ապացուցված էր, թե ընտրություններում ինչ թվեր են լինելու: Իսկ այս ընտրությունները իրենց մեջ անտարբերության էլեմենտ էին պարունակում: 96-ին ժողովուրդը միավորվել էր, իսկ հիմա դա տեղի չունեցավ»:
Մանուկյանն անդրադառնալով Րաֆֆի Հովհաննիսյանին, ասաց, որ նա երկու հնարավորութուն ունի. «Մեկը` ընդունել այս արդյունքները ու չբողոքարկել: Ինքը անկեղծ համոզված է, որ հաղթել է՝ դրա համար էլ իր համար դժվար է ու բնական է. այս քայլն անելով բոլորը կմեղադրեն թե ծախված է: Բայց այդ քայլը կլինի օրիգինալ քայլ: Ես չգիտեմ, թե դա ժողովրդին ինչ կտա, գուցե համախմբում նրա շուրջ: Երկրորդ քայլը` գնալ հանրահավաքների, ինչն էլ աստիճանաբար կմաշվի կգնա… Ու նորից կգա նույն անտարբեր վիճակը: Բայց ճանապարհ որոշողը Րաֆֆի Հովհաննիսյանն է: Իսկ երրորդ ճանապարհ չեմ տեսնում: Րաֆֆի Հովհաննիսյանի ձայները ցույց են տալիս, որ իշխանությունը պետք է հաշվի նստի նրա հետ»:
Ինչ վերաբերվում է Սերժ Սարգսյանին, ապա ըստ Մանուկյանի` նա մտածելու բան չունի, քանի որ կարծում է, որ ինքը հաղթել է անկեղծ ճանապարհով. «Մեր դեմ խաղ չկա բանաձեւը մաշվել գնացել է: Իսկ քաղաքականությունը կոմպրոմիսներ է»:
Վազգեն Մանուկյանը համոզված է՝ այս նախագահական ընտրություններն այն հարյուր տոկոսանոց մաքուր ընտրությունները չեն, բայց մի բան պարզ է` նախորդ նախագահական ընտրություններից մաքուր էին, ինչում նա համոզվել է իր հարցումներում, որովհետեւ շատ տեղերում նորմալ է անցել, պակասել է կրիմինալը:
Կարդացեք նաև
Եվա ՀԱԿՈԲՅԱՆ
