«Al Jazeera»-ն, ընտրությունների արդյունքները հրապարակելով, նշել է, որ Րաֆֆի Հովհաննիսյանի վստահված անձինք քվեարկության օրն ահազանգել են մի շարք ընտրախախտումների մասին, օրինակ՝ անձնագրերում դրված կնիքի թանաքի ժամանակից շուտ անհետացումը, ինչը հնարավորություն է տվել բազմաթիվ անգամներ ընտրել։ Հայտնի այս հեռուստաընկերությունը նաեւ արձանագրել է, որ ՀՀ–ում «իշխանամետ ընտրողները» տաքսիներով ու ավտոբուսներով ընտրատեղամասեր են տարվել։
«France-Presse»-ը գրել է. «Հայաստանի նախագահը հաղթում է վիճահարույց ընտրություններում», եւ արձանագրել, որ ընտրությունների ելքը կանխատեսելի էր դեռ 2012-ի դեկտեմբերին, երբ ԲՀԿ նախագահ Գ. Ծառուկյանն ու ՀՀ առաջին նախագահ Լ. Տեր-Պետրոսյանը հայտարարեցին, որ չեն մասնակցելու ընտրություններին։ Գործակալությունն ընդգծել է, որ ընտրությունները մթագնել են ուժեղ ընդդիմության բացակայությունը եւ նախագահի թեկնածու Պարույր Հայրիկյանի դեմ կատարված խորհրդավոր մահափորձը։
«Reuters»-ը տեղեկացրել է, թե նախագահական ընտրությունները մթագնել են քվեարկության օրը տեղի ունեցած մեքենայությունների մասին մեղադրանքներն ու դրանց ոչ մրցակցային լինելը։
«The New York Times»-ը, նշելով, թե Սերժ Սարգսյանը հեշտությամբ հաղթանակ է տարել նախագահական ընտրություններում, արձանագրել է. «Սարգսյանի կուսակցությունը որոշակիորեն ոչ պատշաճ ձևով է կիրառել պետական ռեսուրսները, ինչը սովորական քննադատություն է հետխորհրդային հանրապետություններում գործող նախագահի թեկնածուների հասցեին»:
Կարդացեք նաև
«Հայկական ժամանակ»
