«Մենք հանդիպել ենք ՀՀ նախագահի բոլոր թեկնածուներին, իշխանական մարմիններին: Լարվածություն չկար, ամեն ինչ անցավ դրական»,-այսօր լրագրողների հետ հանդիպման ժամանակ 2013թ.-ի ՀՀ նախագահի թեկնածուի ընտրության ընթացքի մասին նշեց ԱՊՀ դիտորդ Սերգեյ Լեբեդեւը:
Նրա պնդմամբ շատերը երբեմն իրենց պարտությունը չեն կարող ընդունել, կարեւոր է դա պատվով հաղթահարել: Մինչ ընտրությունները պետք է պայքարել, սակայն ընտրություններից հետո անհրաժեշտ չէ բողոքարկել, քանզի սա հայ ժողովրդի հաղթանակն է.
«Մենք բարեկամաբար ենք նայել ընտրություններին՝ նպատակն էր պահպանել Հայաստանի քաղաքացիների իրավունքները ընտրությունների ժամանակ: Ամեն ինչ դրական էր՝ սեւ փիառ, լարվածություն ու կեղտոտ մեկնաբանություններ չկային»:
Դիտորդի համոզմամբ բոլոր թեկնածուները ներկայանալու նույն շանսերն ու հնարավորություններն ունեին՝ ՀՀ քաղաքացիները ծանոթ էին նրանց գործելակերպին:
Ընտրությունների ավարտից հետո 8 պետություն ուսումնասիրել է ընտրական փաստերը եւ եկել են այն եզրակացության, որ ընտրությունները եղել են ազատ, արդար եւ բաց:
ԱՊՀ դիտորդ Նիկոլայ Լոզովիկի խոսքով ընտրությունները մրցակցային էին. «Իշխանությունները երեւում են ընտրությունների ժամանակ, ոչ թե ցույցերի: ՀՀ քաղաքացիների 60 %-ի ձայնը գործող նախագահինն էր՝ 40 %-ը մյուս թեկնածուներինը»:
Ղազախստանի ներկայացուցիչ Մարատ Սարսեմբաեւի խոսքով՝ 30 մարդ Ղազախստանից մասնակցել է ընտրություններին: Ամեն ինչ պրոֆեսիոնալ ձեւով էր, բարձր մակարդակի վրա:
Անժելա ՇԱՀՈՒՄՅԱՆ
