Քաղաքական և ընտրական տեխնոլոգիաների փորձագետ Արմեն Բադալյանը մինչ նախագահական ընտրությունները բազմաթիվ առիթներով կարծիք է հայտնել, թե ՀՀ նախագահի ընտրություններն ավարտված են. Սերժ Սարգսյանը հաղթել է էպոսագետին:
Այսօր ԿԸՀ-ն արդեն հրապարակել է ընտրությունների նախնական արդյունքները https://www.aravot.am/2013/02/19/204588/, որոնց համաձայն՝ առաջին տեղում է Սերժ Սարգսյանը, երկրորդ տեղում՝ Րաֆֆի Հովհաննիսյանը:
Aravot.am-ը պարոն Բադալյանից հետաքրքրվեց՝ հիմա է՞լ է կարծում, որ Ս. Սարգսյանը հաղթել է էպոսագետին: Նա պատասխանեց. «Ես նկատի չեմ ունեցել կոնկրետ էպոսագետին, այլ այն, որ բոլոր թեկնածուներն էլ, այսպես ասած, էպոսագետի գործառույթ են իրականացնում: Ու հաղթեց, իհարկե, չակերտներում հաղթեց: Ոչ թե հաղթեց, այլ դարձավ, քանի որ հաղթում են ազնիվ արդար ընտրություններում»:
Մեր այն դիտարկմանը, եթե ոչ թե միայն «Ժառանգությունը», այլև ուրիշ ընդդիմադիր ուժեր էլ սատարեին Ր. Հովհաննիսյանին՝ հնարավո՞ր է գրանցվեր այլ արդյունք, պարոն Բադալյանն այսպես արձագանքեց. «Բացառված է, քանի որ նախ ընդդիմադիր դաշտ հասկացություն չկա, ի սկզբանե, որոշված էր՝ ով է լինելու առաջին տեղում, ով՝ երկրորդ: Այդ դեպքում ուղղակի գումարները, որոնք քվեարկությունից առաջ հինգ-տասը հազար բաժանում էին միայն մասնակցություն ապահովելու համար, այդ գումարների թիվը կավելանար ու մի քիչ ավելի բարձր կլիներ մասնակցությունը: Բայց բացառվում է, որ Ր. Հովհաննիսյանը դառնար նախագահ»:
Կարդացեք նաև
Հաշվի առնելով, որ ըստ պաշտոնական տվյալների՝ Րաֆֆի Հովհաննիսյանին տրված ձայների քանակն ավելին է, քան 2008-ին Լեւոն Տեր-Պետրոսյանինն էին՝ հետաքրքրվեցինք՝ հնարավո՞ր է ընդդիմադիր դաշտում ուժերի վերադասավորում: Ա. Բադալյանը պատասխանեց. «Ընդդիմադիր դաշտ հասկացություն գոյություն չունի, դա լրագրողները հորինել են: Այլ հարց է, թե ազդեցիկ ուժերը քաղաքական ապագա ունե՞ն, թե՞ ոչ: Եթե որակապես փոփոխության ենթարկվեն, նրանք ապագա կունենան: Իսկ այս նկարված 36 տոկոսը շատ կարճ ժամանակ է տևելու: Երբ նրանք բարեփոխված կմասնակցեն ընտրություններին, կտեսնենք, թե ինչպես է այդ 36-ը իջնում 5-6 տոկոսի»:
Տաթև ՀԱՐՈՒԹՅՈՒՆՅԱՆ
ՈՒզում է հայի ստրկատերը լինել, իսկ հայի ուզելը կարևոր չէ;Ստրուկներին տեր պետք է, որ ստրուկ լինելը չմոռանան…Վայ էն ստրկատիրոջը, որը ոչ թե միայն հոգով ու մտքով է ստրուկ, այլ ուրիշի ստրուկն է, իր ազգի ստրկատերը;
ՀՀ նախագահի ընտրություններն ավարտված են. Սերժ Սարգսյանը հաղթել է էպոսագետին: