ՀՀ նախագահի թեկնածու Արման Մելիքյանը` մյուս թեկնածուների քաղաքական ապագայի մասին
«Արդեն ժամը 18-ի դրությամբ հասկանալի էր, որ Հայաստանում քվեարկությանը մասնակցել է ֆիզիկապես ներկա ընտրողների 100%- ից էլ գուցե մի քիչ ավելի, իսկ սա նշանակում է, որ ինչպես կանխատեսել էինք՝ ընտրություները փաստացիորեն կեղծվել են և չեն արտահայտում ժողովրդի կամքը»,-Aravot.am-ի հետ զրույցում, ամփոփելով նախագահական ընտրությունների ընթացքը,ասաց ՀՀ նախագահի թեկնածու Արման Մելիքյանը:
Թեկնածուի կարծիքով մասնակցության վերաբերյալ ներկայացված թվերը չեն կարող համապատասխանել իրականությանը: Պատասխանելով իշխող կուսակցության ներկյացուցիչների հայատարարություններին, որ ընտրախախտումների մասին եղած ահազանգերը լոկ հայտարարություներ են` առանց փաստերի և արդյունքների վրա չեն կարող էական ազդեցություն ունենալ, Մելիքյանն ասաց. «Պետք է հստակ հասկանանք, որ բնակչության զգալի մասը ահաբեկված է և չի ցանկանոմ որևէ կերպ խախտումների մասին բարձրաձայնել: Մյուս կողմից` կան խախտումների տեսակներ, որոնք հնարավոր չէ ֆիզիկապես հայտնաբերել ընտրատեղամասում`այդ թվում նաև Հայաստանից բացակայող քաղաքացիների քվեների օգտագործման ձևը: Հատկապես նաև այն պատճառով, որ ընտրողների ստորագրած գրանցամատյանները հասանելի չեն հանրությանը` վստահված անձանց և դիտորդներին, բայց իշխանություններին հո՞ հասանելի են»:
Կարդացեք նաև
Իր մոտեցումներն ու վերաբերմունքը կատարվածին Մելիքյանի շտաբը կհրապարակի փետրվարի 20-ին:
Հարցին, եթե նախագահի մյուս թեկնածուները համատեղ գործողություներ մշակեն, Մելիքյանը կմիանա՞ նրանց, պատասխանե . «Դատելով նրանից, թե ինչ գործողություներ էին մշակել մինչև քվեարկության օրը` չեմ կարծում , որ դրանից հետո կկարողանան որևէ բան անել , որին միանալու հիմքեր կլինեն: Գուցե մի քիչ փնթփնթան մութ անկյուններում, բայց այս կամ այն կերպ կճանաչեն ընտրություների արդյունքները: Այս տեսանկյունից նրանք մինչև վերջ արեցին այն, ինչին որ լծվել էին: Ուստի կարող են իրենց գործը ավարտված համարել , գուցե նաև քաղաքական ապագան դրանով վտանգած կլինեն»:
Այլ մանրամասները` տեսանյութում:
Նելլի ԳՐԻԳՈՐՅԱՆ
